කරන්දෙණිය .එම්.සුසිල් ප්‍රියන්ත

මත්පැන් සාදයක මිතුරකුට දුන් දඬුවම කරකැවී ගොස් භාර්යාවට විඳින්නට සිදුවූ අපූරු කතාවක් ගාලු‍ දිසාවේ ගමකින් අසන්නට ලැබේ.
හේ ඇල්වතුරත් නිවල පානය කරන අයෙකි. එහෙත් මිතුරන් සෙට් වනවිටදී සැර ජාතිය පාවිච්චි නොකළත් ඒ සඳහා ගන්නා කලවම් කිරීමට ගන්නා පැණි බීම පානය කිරීමට රුසියෙකි. මරුවෙකි. මෙය මිතුරන්ට ඉමහත් කරදරයකි. පාඩුවකි. අවාසියකි. මේ සම්බන්ධයෙන් මුවින් නොකීවත් මිතුරන් සිටියේ දැඩි කේන්තියෙනි. අමනාපයෙනි.
 එදාත් මිතුරෝ එක් වූහ. ඔහුද ඊට සහභාගී විය. මෙදා මිතුරන් ඔහුට සෙට්වීම සඳහා ගත් කෙටි කෑම සහ සැන්ඩි වෙන්කර දුන්හ. මේවා කටට දෙකට හලා ගත් ඔහු නිවසට ගියේ රෑබෝවී තිබූ නිසාත් ඔහුගේ අධික කුස ගින්න මේ දේවල්වලින් වැසීමට නොහැකි නිසාත්ය.
ගිය පයින්ම ඔහු භාර්යාව වෙන කවරදාවත් නොපිසූ ආකාරයට අලු‍ත්ම ක්‍රමයට උයාපිහා තිබූ මාළුද සමග රෑ බත් පත ගිල දැම්මේය. ගතවූයේ ටික වේලාවකි. ඔහුගේ බඩ බුරුල් විය. වැසිකිළි අවශ්‍යතාවය ඇති විය. ඒ සඳහා වරක් වැසිකිළියට ගියේය. තවත් වරක් ගියේය. යන වාරයේ වේගය අනුව ඔහුට වැසිකිළියේ ළඟින්නටම සිදුවිය. මේ හදිසියේ කඩාපාත්වුණු මේ බඩේ අමාරුව සෑදුණේ භාර්යාව අමුතු විදිහට අලු‍ත් ක්‍රමයට සෑදූ මාලු‍ පාරිභෝජනය කිරීමෙන් යයි සැක සිතුවේය.

තත්වය එන්න එන්නම දරුණුය. බඩේ අමාරුවද වැඩිවීමක් මිස අඩුවීමක් නොවීය. මේ සම්බන්ධයෙන් ඔහු භාර්යාව සමග සිටියේ දැඩි කේන්තියකිනි. මේ සම්බන්ධයෙන් භාර්යාව සහ ඔහු අතර රණ්ඩුවක් ඇතිවීමට මූල බීජය වැපිරිණ. ඔහුගේ බඩේ අමාරුවේ තත්වය මෙන්ම ඉවසීමේ සීමාවද පැන්නේය. එකට එක කියමින් නිවැරදි කාරියක්වීමට කතා කළ සිය භාර්යාවට තඩි බෑවේද ඉන් අනතුරුවය. භාර්යාව අඬ, අඬා ඇඳේය. ඔහු බඩ එළිය සඳහා සැරින් සැරේට වැසිකිළියේය.
මිතුරාට ඇටවූ බඩ විරේක උගුලේ තත්වය සොයා බැලීමට එක් අයෙකු දුරකතන ඇමතුමක් දුන්නේය. මචං හරි වැඬේනේ අපේ නෝනා මාලු‍ අමුතු විදිහකට හදලා මම ඒක කාපු වෙලේ ඉඳලා වැසිකිළියේ. මචං මට අමාරුයි. මම ඒ ගැන කිව්වාම නෝනා දොඩවගෙන ආවා. මම ඇයට දුන්න දෙකක්. අන්න දැන් අඬ, අඬා ඉන්නවා. මෙය ඇසූ මිතුරා අනෙක් මිතුරන්ට මේ බව පවසා ඇත්තේ බඩ අල්ලාගෙන සිනා සෙමින්ලු‍.