පොලිස් නිලධාරීන්ගෙන් කසිප්පු ඉල්ලා එක් අයකුට රුපියල් පන්දහස බැගින් රුපියල් දහදහසක දඩ මුදලක් අධිකරණයට ගෙවීමට සිදුවීමේ පුවතක් සියනෑවෙන් වාර්තා විය.
එම ගමට කාලයක සිට යාබද ගමකින් කසිප්පු ජංගම සේවයක් දිවා හා සවස් වරුවේ පැමිණේ. ත‍්‍රිරෝද රියකින් ගෙනෙන ජංගම සේවා කසිප්පු මුදලට හෝ ණයට ගැනීමට ගැණුම්කරුවෝ පෙරමග බලමින් සිටිති. පොලිස් ඇස ද මේ ජංගම සේවාව වෙත යොමුවී තිබුණි.
සවස් වරුවක මේ ජංගම සේවාව තම පාරිභෝගිකයින්ගේ මනදොළ පිනවීම සඳහා සුබ නැකතින් පිටත් විය. පොලිස් නිලධාරීහු මග රැකසිට ජංගම සේවාව අත්අඩංගුවට ගත්හ.
පොලිස් නිලධාරියෙක් වාහනය පැදවීමේ වගකීම භාරගෙන ඉදිරියට ධාවනය කළේය. පාර අයිනේ දෙදෙනෙකි. සුපුරුදු වාහනය හඳුනාගෙන නැවැත්වීමට සන් කෙරිණි.
”මට බෝතලයයි”
”මටත් බෝතලයයි”
”නගින්න නගින්න ඉක්මනට ඇතුළෙදී දෙන්නම් දන්නවනෙ පොලිසිය හැම තැනම” පොලිස් නිලධාරීයා පැවසීය. දෙදෙනාම රියට නැගුණි. ඒ සමගම වැඬේ වැරදුණ බවද වැටහුණි.
”දැන් ඉතින් යමල්ලා අපි පොලිසියෙන්” ගමන කෙළවර වූයේ පොලිසියෙනි.