දේවහුව - ප්‍රසාද් ජයකොඩි
දිනපතා චූන් පාන් රථයෙන් පාන් හා කෑම වර්ග ලබාගත් තරුණියක මාස කිහිපයකදී ඇති කරගත් සම්බන්ධතාවක් දුර දිග ගොස් මාස දහයක් දීග කෑමේ පුවතක් මහවෙල පොලිස් වසමෙන් වාර්තා විය.

ඉතා දුෂ්කර‍ ප්‍රදේශයක පදිංචි මෙම තරුණිය අධ්‍යාපනය ලැබීම සඳහා කිලෝ මීටර් ගාණක් දුර පාසල් යාමට තිබූ නිසා කඩින් කඩ පාසල් ගොස් ඇත. ඇගේ මව්පියන් හේන් ගොවිතැන් කිරීම නිසා පාසල් යන ලෙස බල කිරීමක් කර නැති බව ගම්මු පවසති.

වයස අවුරුදු දාසයයි මාස දහයක් වූ ඇය තම ගමට පැමිණෙන චූන් පාන් රථයෙන් දිනපතා පාන් හා බනිස් මිලදී ගැනීමට පුරුදු වී සිටියාය. අතේ මුදල් නොතිබුණත් චූන් පාන් කොලුවා ඇයට අවශ්‍ය පාන් හෝ බනිස් ලබා දී විනාඩි කිහිපයක් කතා කරමින් සිට යාම පුරුද්දක් කරගෙන ඇත.

මේ අයුරින් ඉතා ළඟින් ඇසුරු කිරීම නිසා උදේ සවස චූන් පාන් විකිණීමට යාමේදී ටික දිනකදී ඇගේ නිවෙසට ගොස් ඇයට අවශ්‍ය බනිස් හෝ පාන් ලබා දී එම නිවෙසින් තේ බී පැයක් පමණ ගත කිරීම මෙම චූන් පාන් රියැදුරුගේ දින චරියාවේ කොටසක් විය. මේ වන විට වයස අවුරුදු 17 වූ දැරිය හා චූන් පාන් විකිණීමට පැමිණෙන පුද්ගලයාගේ ප්‍රේම සම්බන්ධතාව නිවෙස් දෙකටම ආරංචි වී ඇත. එහි ප්‍රතිඵලයක් ලෙස මෙම නිවෙස් දෙකේම නිවැසියෝ මොවුන් දෙදෙනා පිළිබඳව කතිකා කරගෙන වයස 18 වන විට නීත්‍යනුකූලව විවාහ වනතුරු වෙනත් නිවෙසක එකට වාසය කිරීමට අවස්ථාව ලබාදීමට එකඟ වූහ. ඒ අනුව චූන් පාන් අලෙවි කරන පුද්ගලයාගේ නිවෙසේ දීග කෑමට දෙදෙනාට අවස්ථාවක් උදා විය.

මෙම තරුණිය හා තරුණයා මාස දහයක් පමණ අඹු සැමියන් ලෙස එකට එක නිවෙසේ ජීවත් වී ඇත. මාස දහය තුළ ඉතාමත් සහයෝගයෙන් ජීවත් වූ අතර, ඒ වන විට මෙම දෙදෙනා මව්පියන්ගෙන් ලැබුණු ඉඩමක නිවෙසින් අඩක් ඉදිකර ඇත.

නිවෙස් දෙකේම මව්පියන්ගේ ආශිර්වාදය තුළ කසාද නොබැඳ මාස දහයක් දීග කෑ අතර, මෙම දීගයට තිත තැබීමට චූන් පාන් අලෙවි පුද්ගලයා කල්පනා කර ඇත. ඒ අනුව මෙම තරුණිය ඇගේ මව්පියන් වාසය කරන නිවෙසට ආපසු යවා ඇත. 

තරුණියගේ මව්පියන් මහවෙල පොලීසියේ පිහිට පතා පවසා ඇත්තේ, චූන් පාන් අලෙවි කළ පුද්ගලයා තම දියණියට විවාහ කරගන්නා බවට පොරොන්දු වී මාස දහයක් දීග කා ඇති බවත්, විවාහ වීමට කල වයස සම්පූර්ණ වූ විට නීත්‍යනුකූලව විවාහ කරගන්නා බවට පොරොන්දු වී එක්ව ගිය බවයි. 

මව්පියන් පොලීසියේ පිහිට පතා ඉල්ලා ඇත්තේ, චූන් පාන් අලෙවි කර පුද්ගලයා කෙසේ හෝ තම දියණියට විවාහ කර දීමට අවශ්‍ය කටයුතු සලසා දෙන ලෙස යැයි තරුණියගේ ගමෙන් වාර්තා විය.