ස්මාර්ට් " පික් පැක් " වෙළඳ ආයතනයෙහි 16 වැනි ශාඛාව ගම්පහ - කොළඹ පාරේ අංක 255/1/1 දරන ස්ථානයේදී ඉකුත් දා සුභ මොහොතින් ආරම්භ කෙරිණි.

දිවයිනෙහි විවිධ ප්‍රදේශවල මේ වනවිට ආරම්භ කොට ඇති මෙම වෙළඳ ව්‍යාපාරය මගින්, පාරිභෝගිකයන් විසින් දුරකතන මාර්ගයෙන් කරනු ලබන සියලු ඇණවුම් නිවාස ඇතුළු ඕනෑම ස්ථානයකට රැගෙන ගොස් බාරදීම සිදු කරනු ලබන බව එම ව්‍යාපාරයේ සභාපති අනුර ජයසිංහ මහතා සදහන් කළේය.

මෙලෙස ඇණවුම් කොට ලබා ගන්නා ද්‍රව්‍ය සහ භාණ්ඩ සඳහා මුදල් ගෙවීම එක්වර මෙන්ම පොලී රහිතව වාරික වශයෙන් ගෙවීමේ හැකියාව පැවතීම විශේෂත්වයක් බව එම ආයතනය සඳහන් කරයි.

අනුරාධපුර දිස්ත්‍රික්කයේ කැකිරාව ප්‍රදේශයෙහි ආරම්භ කළ මෙම ව්‍යාපාරය දිස්ත්‍රික් මට්ටමින් ව්‍යාප්ත කිරීමටද සැලසුම් කොට ඇති බව ආයතන කළමනාකාරිත්වය සදහන් කරයි.

ස්මාර්ට් " පික් පැක් " වෙළඳ ව්‍යාපාරයෙහි ගම්පහ ශාඛාව විවෘත කිරීම ගම්පහ ප්‍රාදේශීය ලේකම් සුරංගා ගුණතිලක මහත්මියගේ ප්‍රධානත්වයෙන් සිදු කෙරුණු අතර මෙම අවස්ථාවට ව්‍යාපාර සභාපති අනුර ජයසිංහ, එහි ප්‍රධාන විධායක රොෂාන් පනාවල, ජ්‍යෙෂ්ඨ මෙහෙයුම් කළමනාකාර කණිෂ්ක දෙනවක , ගම්පහ ශාඛා කළමනාකාර රොහාන් උදය කුමාර, රසිකා ඉලුක්කුඹුර යන මහත්ම මහත්මීන් ඇතුළු පිරිසක් එක්ව සිටියහ.