දකුණු ආසියානු රටවල ගුවන් නිරුපද්‍රිතතාව වර්ධනය කිරීම උදෙසා පිහිටුවා ගනු ලැබූ COSCAP - South Asia (Cooperative Development of Operational Safety and Continuing Airworthiness Program – South Asia) සංවිධානයේ 32 වන සමුළුව ඉකුත්දා (22) ඉන්දියාවේ නව දිල්ලියේදී ආරම්භ විය.

සිවිල් ගුවන්සේවා අධ්‍යක්ෂ ජනරාල් සහ ප්‍රධාන විධායක නිලධාරී විශ්‍රාමික එයාර් වයිස් මාර්ෂල් සාගර කොටකදෙණිය මහතාගේ සභාපතිත්වය යටතේ අප්‍රේල් 25 දින දක්වා මෙවර සමුළුව පැවැත්වේ. පසුගිය වසරේ භූතානයේ පාරෝ හි දී පැවති 31 වැනි සැසි වාරයේ දී ඉදිරි දෙවසරක කාලය සඳහා COSCAP - SA වැඩසටහනෙහි සභාපතීත්වය ශ්‍රී ලංකාවට හිමිවිය.

දකුණු ආසියානු කලාපයේ සාමාජික රටවලට අමතරව ගුවන් යානා නිෂ්පාදක සමාගම් මෙන්ම ජාත්‍යන්තර නියාමන සහ පාර්ශවකාර ආයතන රැසක නියෝජිතයන් පිරිසක් තෙදිනක් පුරා නව දිල්ලි නුවර දී පැවැත්වෙන මෙම සමුළුව සඳහා සහභාගී වන අතර මෙවර සමුළුවේ සත්කාරකත්වය දරනු ලබන්නේ ඉන්දියාවයි.