වසර දහස් ගණනක ඉතිහාසයකට හිමිකම් කියන ජින්සෙන් ශාකය ලොව විවිධ සංස්කෘතීන්හි ස්වාභාවික ඖෂධයක් ලෙස භාවිත කර ඇති වටිනා ශාකයකි. විශේෂයෙන්ම කොරියානු පැනැක්ස් ජින්සෙන් ලොව ජනප්‍රියම හා මිල අධික ඖෂධීය ශාක අතරින් එකක් ලෙස සැලකේ. ඇතැම් අවස්ථාවලදී එය “ශාක ලෝකයේ රජු” ලෙසද හඳුන්වනු ලබයි.

ජින්සෙන් ශාකයේ ඇති ප්‍රධාන ක්‍රියාකාරී සංයෝගය ලෙස සැපොනින් (Saponins) හඳුනාගෙන ඇත. නවීන විද්‍යාත්මක පර්යේෂණ රැසකින් ජින්සෙන්හි අඩංගු සංයෝග මගින් ශරීරයේ විවිධ කායික හා ජීව විද්‍යාත්මක ක්‍රියාකාරකම් සඳහා සහාය විය හැකි බව පෙන්වා දී ඇත. 

ජින්සෙන් සම්බන්ධයෙන් විශේෂ අවධානයක් යොමුවී ඇත්තේ රුධිර සීනි මට්ටම පාලනය කිරීම සම්බන්ධයෙන්ය. ඇතැම් වෛද්‍ය පර්යේෂණවලින් ජින්සෙන්හි අඩංගු සංයෝග මගින් රුධිරයේ ග්ලූකෝස් මට්ටම පාලනය කිරීමට සහ ශරීරයේ ග්ලූකෝස් නිෂ්පාදනයට බලපෑම් කිරීමට හැකි බව පෙන්වා දී ඇත. එමෙන්ම ඉන්සියුලින් ක්‍රියාකාරීත්වයට සහාය විය හැකි බවටද පර්යේෂණ මගින් කරුණු ඉදිරිපත් කර තිබේ.

මීට අමතරව, රුධිර පීඩනය, කොලෙස්ටරෝල් මට්ටම, රුධිර සංසරණය සහ ශරීරයේ විවිධ අවයවවල සාමාන්‍ය ක්‍රියාකාරීත්වය සම්බන්ධයෙන්ද ජින්සෙන්හි ඇතිවිය හැකි ප්‍රතිලාභ පිළිබඳව අධ්‍යයනය කර ඇත. ශ්‍රී ලංකාවටද මෙම වටිනා ස්වාභාවික නිෂ්පාදනය පිළිබඳව අවධානය යොමු කිරීමට අවස්ථාවක් ඇති අතර, ගුණාත්මක හා නිසි ප්‍රමිතියෙන් යුතු ජින්සෙන් නිෂ්පාදන තෝරාගැනීම වැදගත්ය.

ජින්සෙන් සම්බන්ධ විවිධ පර්යේෂණ තිබුණද, එය සියලු‍ රෝග සඳහා ප්‍රතිකාරයක් ලෙස සැලකිය යුතු නොවේ. විශේෂයෙන් දියවැඩියාව හෝ වෙනත් නිදන්ගත රෝග සඳහා ඖෂධ භාවිත කරන පුද්ගලයන් ජින්සෙන් අඩංගු නිෂ්පාදන භාවිත කිරීමට පෙර වෛද්‍ය උපදෙස් ලබා ගැනීම සුදුසුය.