2024 වසරේ දෙවැනි කාර්තුවේ වත්කම් හා සැසඳීමේදී රු. බි. 165ක ඉහළ යාමක්

භානුක අමරසිංහ 

2025 වසරේ දෙවැනි කාර්තුව අවසන් වනවිට මෙරට රක්ෂණ ක්ෂේත්‍රය සතු වත්කම්වල වටිනාකම රුපියල් මිලියන 1,308,840 ක් (ට්‍රිලියන 1.3ක්) ලෙස සටහන්ව තිබේ.

ශ්‍රී ලංකා රක්ෂණ නියමාන කොමිෂන් සභාව මගින් ඉදිරිපත් කර ඇති 2025 දෙවැනි කාර්තුව සඳහා වන සංඛ්‍යා දත්තවල මේ බව සඳහන් කෙරී ඇත. මෙය 2024 වසරේ දෙවැනි කාර්තුවේදී පැවැති රුපියල් මිලියන 1,143,253 ක (ට්‍රිලියන 1.1ක) වත්කම් හා සැසඳීමේදී රුපියල් බිලියන 165ක ඉහළ යාමකි. 

මේ අතරින් ජීවිත රක්ෂණ ක්ෂේත්‍රය සතු වත්කම් ප්‍රමාණය රුපියල් බිලියන 990ක් ලෙස සටහන්ව ඇති අතර, සාමාන්‍ය රක්ෂණ ක්ෂේත්‍රයේ එය රුපියල් බිලියන 305 ක් සහ ප්‍රතිරක්ෂණ ක්ෂේත්‍රයේ එය රුපියල් බිලියන 12.8 ක් ලෙස සටහන්ව තිබේ. 

මෙහිදී ජීවිත රක්ෂණ අංශය සතු වත්කම් ප්‍රමාණය 2024 වසරේ දෙවැනි කාර්තුවේදී පැවැති රුපියල් බිලියන 855 හා සැසඳීමේදී සියයට 16ක වර්ධනයක් පෙන්නුම් කර තිබේ. ඒ යටතේ කොටස් ආයෝජන (සියයට 50කින්), තැන්පතු (සියයට 33කින්), සාංගමික ණය (සියයට 25කින්) යන අංශ සතු වත්කම් ඉහළ ගොස් ඇත.

එසේම සාමාන්‍ය රක්ෂණය සතු වත්කම 2024 වසරේ දෙවැනි කාර්තුවේදී පැවැති රු. බිලියන 276 හා සැසඳීමේදී සියයට 10ක වර්ධනයක් පෙන්නුම් කර තිබේ. මේ යටතේ ඒකක භාර (සියයට 94කින්), සම්බන්ධිත සමාගම් තුළ ආයෝජන (සියයට 78කින්) සහ කොටස් ආයෝජන (සියයට 59කින්) ලෙස වත්කම් ඉහළ ගොස් තිබේ.

ප්‍රතිරක්ෂණ ක්ෂේත්‍රයේ වත්කම්ද 2024 වසරේ දෙවැනි කාර්තුවේදී පැවැති රුපියල් බිලියන 11.8ට හා සැසඳීමේදී සියයට 9ක වර්ධනයක් පෙන්නුම් කර තිබේ. ඒ යටතේ රජයේ ණය සුරැකුම්පත් තුළ ආයෝජනය (සියයට 35කින්) ඉහළ ගොස් තිබේ. 

මේ අතර 2020 වසරේ සිට 2024 වසර දක්වා මෙරට රක්ෂණ ක්ෂේත්‍රයේ වත්කම් පිළිවෙළින් රුපියල් බිලියන 796 ක්, රුපියල් බිලියන 890 ක්, රුපියල් බිලියන 950 ක්, රුපියල් ට්‍රිලියන 1.13 ක් සහ රුපියල් ට්‍රිලියන 1.21 ක් ලෙස කැපීපෙනෙන වර්ධනයවීමක් පෙන්නුම් කර තිබේ.