ඉලක්කය සපුරා ගන්නට බැරිවෙයි

අප්‍රේල් මාසය සමග සැසදීමේදී සියයට 31 කින් පමණ පහළ යාමක්
දිනපතා සංචාරක පැමිණීමේ සාමන්‍යයද 5,820 සිට 4,288 දක්වා පහළට

විමුක්ති එස් රුද්‍රිගු

පසුගිය මැයි මස පළමු වැනිදා සිට 31 වැනිදා දක්වා මෙරටට සංචාරකයන් 132,919 ක් පැමිණ ඇති බවත් එය 2024 මැයි මාසයට සාපේක්ෂව සියයට 18.5 ක වර්ධනයක් බවත් ශ්‍රී ලංකා සංචාරක සංවර්ධන අධිකාරියේ නවතම දත්ත වාර්තා පෙන්වා දුන්නේය.
කෙසේ නමුත් පසුගිය අප්‍රේල් මාසය සමග සංසන්දනය කිරීමේදී මැයි මාසයේදී මෙරටට සංචාරකයන්ගේ පැමිණීම සියයට 31 කින් පමණ පහළ ගොස් ඇත. එසේම දිනපතා සංචාරකයන්ගේ පැමිණීමේ සාමන්‍යයද 5,820 සිට 4,288 දක්වා පහළ ගොස් තිබේ.
2024 මැයි මාසයේදී මෙරටට සංචාරකයන් 112,128 පැමිණ තිබිණි. මැයි මාසයේදී 165,118 ක සංචාරකයන් පිරිසක් මෙරටට ගෙන්වා ගැනීමට සංචාරක කර්මාන්තය ඉලක්ක කර තිබුණත් එම ඉලක්කය සපුරා ගැනීමට සංචාරකයන් 32,199 ක් එසේත් නැතිනම් සියයට 20ක් හිඟ විය. ඒ අනුව මෙම වසරේ මුල් මාස 5 තුළදී මෙරටට පැමිණි සංචාරකයන් ගණන 1,029,803 කි. එය පසුගිය වසරේ පළමු මාස පහ සමග සංසන්දනය කරන විට සියයට 20 ක වර්ධනයකි.
මෙම වසරේදී මෙරටට සංචාරකයන් ලක්ෂ 30 ක් ගෙන්වා ගැනීමට සංචාරක අමාත්‍යාංශය ඉලක්ක කර ඇති අතර එම ඉලක්කය සපුරා ගැනීම ඉතිරි මාස 07 තුළදී මෙරටට සංචකරයන් 1,970,197 ක් මෙරටට පැමිණිය යුතුව ඇත. එම ඉලක්කය සපුරා ගැනීම සඳහා ඉතිරි මාස 07 දී සාමාන්‍යයෙන්, මසකට මෙරටට සංචාරකයන් 282,000 ක් පැමිණිය යුතුව ඇත. එහෙත් පළමු මාස 5 තුළ මෙරටට පැමිණි සංචාරකයන්ගේ සාමාන්‍ය 206,000 කි.
මෙම මසදී මෙරටට සංචාරකයන් 112,128 ක් පැමිණෙනු ඇතැයි අපේක්ෂා කර තිබෙන අතර සංචාරක කර්මාන්තය අපහසු ඉලක්කයක් පසුපස හඹා යන බව විශේලේෂකයෝ පෙන්වා දෙති. මෙරටට මාසයකට පැමිණෙන සංචාරකයන්ගේ ගණන 282,000 ක් දක්වා ඉහළ නංවා ගැනීමට සැලකිය යුතු වර්ධනයක් අවශ්‍ය බවද ඔවූහු පවසති.