භානුක අමරසිංහ

මෙරට ප්‍රමුඛතම සමාගමක් වන ඩීසල් ඇන්ඞ් මෝටර් ඉන්ජිනියරින්ග් පීඑල්සී (DIMO) සමාගම බංග්ලාදේශය තුළ සිදු කරන ඉදිකිරිම් යන්ත්‍රෝපකරණ ව්‍යාපාරය මේ වනවිට යම් පරිණත මට්ටමකට පත්වෙමින් තිබෙන බව පවසයි. ඒ අනුව එම වෙළෙඳ පොළේ පවතින ස්ථානය හිමි කරගැනීමට සිය සමාගම වෙත හැකියාව ලැබෙනු ඇතැයි සමාගමේ සභාපති රංජිත් පණ්ඩිතගේ මහතා සඳහන් කරයි.

2024/25 මූල්‍ය වර්ෂය වෙනුවෙන් සමාගම නිකුත් කළ වාර්ෂික වාර්තාව වෙත අදහස් දැක්වීමක් සිදු කරමින් සභාපතිවරයා මේ බව පවසා තිබේ. “භූගෝලීය විවිධාංගීකරණය යටතේ බංග්ලාදේශය තුළ සිදු කරන අපගේ ඉදිකිරීම් යන්ත්‍රෝපකරණ ව්‍යාපාරය, වෙළෙඳ පොළේ එයට හිමි ස්ථානය ලබා ගැනීම සඳහා වන පරිණතභාවයට පත්වෙමින් තිබෙනවා.“ 

2022 මැයි 10 වැනිදා DIMO බංග්ලාදේශ් (පෞද්) සමාගම නමින් ස්ථාපිත කෙරුණු මෙම සමාගම මගින් බර යන්ත්‍රෝපකරණ සහ උපාංග අලෙවිය සහ අලෙවියන් පසු සේවාව ලබා දෙයි. DIMO සමාගම ඉදිරියේදී සිය ව්‍යාපාරය භූගෝලීය වශයෙන් ව්‍යාප්ත කිරිමට සැලසුම් කර ඇතැයිද මෙම වාර්ෂික වාර්තාව තුළ සඳහන්ව තිබේ.
කෙසේ වෙතත් මෙරට තුළ ඇති වූ ආර්ථික අර්බුදයත් සමගින්ම ඉදිකිරීම් ක්ෂේත්‍රය වෙත එල්ල වූ බලපෑම මෙරට තුළ සිය ඉදිකිරීම් යන්ත්‍රෝපකරණ ව්‍යාපාරය වෙත දරුණු ලෙස බලපෑ බව සභාපතිවරයා පවසයි.