ශාඛා 272 ජාලයකට හිමිකම් කියනු ලබන දිවයිනේ ප්‍රමුඛතම රාජ්‍ය සංවර්ධන බැංකුව වන ප්‍රාදේශීය සංවර්ධන බැංකුවේ (RDB) සාමාන්‍යාධිකාරී/ප්‍රධාන විධායක නිලධාරී ලෙස ආචාර්ය අසංග තෙන්නකෝන් මහතා පත්විය.
අසංග තෙන්නකෝන් මහතා බැංකු ක්ෂේත්‍රය සම්බන්ධව පුළුල් දැනුමක් සහිත වසර 25 කට අධික කාලයක් දේශීය මෙන්ම විදේශීය මූල්‍ය ආයතනවල සේවයේ නියුතුව සිටි විශිෂ්ට නායකයකු වන අතර සුළු හා මධ්‍ය පරිමාණ ක්ෂේත්‍රය මෙන්ම අවදානම් කළමනාකරණය, දේපළ කළමනාකරණ, ව්‍යාපෘති මූල්‍යකරණය වැනි ක්ෂේත්‍රවල විශේෂ නිපුණතාවක් දක්වයි.
(RDB) බැංකුව සමඟ සම්බන්ධ වීමට පෙර ඔහු යූනියන් බැංකුවේ ආයතනික බැංකුකරණ අංශයේ උප සභාපතිවරයා ලෙස කටයුතු කළ අතර, එහිදීගනුදෙනුකරුවන් විශාල ප්‍රමාණයකට සාර්ථක මූල්‍ය සේවා ගොඩනැගීමට නායකත්වය ලබා දී ඇත. ඊට අමතරව ඔහු ඩුබායි හා කටාර් හි ඩෝහා බැංකුවේ මූල්‍ය සේවා කළමනාකරණය සඳහා විශාල දායකත්වයක් ලබා දි ඇත.
ඔහු Univesidade Azteca විශ්ව විද්‍යාලයන් ව්‍යාපාර කළමනාකරණය සම්බන්ධ අාචාර්ය උපාධියත්, කොළඹ විශ්වවිද්‍යාලයේ මූල්‍ය ආර්ථිකය සම්බන්ධ ශාස්ත්‍රපති උපාධියත්, ඊට අමතරව බැංකුකරණය හා මූල්‍ය ක්ෂේත්‍රයට අදාළව වෘත්තීය සුදුසුකම් රාශියක් හිමිකරගෙන ඇත. ඔහු ශ්‍රී ලංකා බැංකුකරුවන්ගේ ආයතනයේ උප සභාපතිවරයකු හා තවත් ජාත්‍යන්තර වෘත්තීය ආයතන කිහිපයක ක්‍රියාකාරී සාමාජිකයකු ලෙසද කටයුතු කරයි.