භානුක අමරසිංහ 

මෙරට ප්‍රමුඛතම ඇසුරුම් නිෂ්පාදන සමාගමක් වන JF Packaging Limited සමාගම මූලික මහජන කොටස් නිකුතුවක් හරහා සිය සාමාන්‍ය ඡන්ද හිමි කොටස් ප්‍රමාණයක් කොළඹ කොටස් හුවමාරුවේ ලැයිස්තුගත කිරිමට සූදානමින් සිටින බව වාර්තා වෙයි. 

ඒ සඳහා එම සමාගම ඉදිරිපත් කර තිබූ ඉල්ලීම කොළඹ කොටස් හුවමාරුව මගින් අනුමත කර තිබේ. ඒ අනුව මෙහිදී සමාගමේ සාමාන්‍ය ඡන්ද හිමි කොටස් 51,724,144ක් මිලදී ගැනීම සඳහා නිකුත් කිරීමට නියමිතව ඇති අතර, එහිදී කොටසක මිල රුපියල් 11.60ක් ලෙස සඳහන් කර තිබේ. නිකුතුවේ වටිනාකම රු.මිලියන 600කි. 

මෙම මහජන කොටස් නිකුතුව ලබන ඔක්තෝබර් 30 වැනිදා විවෘත කිරිමට නියමිතව ඇති අතර, ඒ සඳහා හිමිවන දායකත්වයත් සමගින්ම එම කොටස් සිය ප්‍රධාන පුවරුවේ හෝ දිරිසවි පුවරුවේ ලැයිස්තුගත කෙරෙන බවත් කොළඹ කොටස් හුවමාරුව පවසයි. 

JF Packaging Limited සමාගම 1987 වසරේදී පවුලේ ව්‍යාපාරයක් ලෙස ආරම්භ කෙරී ඇති අතර, 2015 වසරේදී එය ලංකෙම් සිලෝන් පීඑල්සී සමාගම යටතට පත්විය.