හම්බන්තොට ජාත්‍යන්තර වරාය සමූහය (HIPG) සිය ප්‍රමුඛතම ප්‍රජා සංවර්ධන ව්‍යාපෘතියක් වන ‘අපේක්ෂාවේ ගම්මානය’ (Hope Village) අරඹනු ලැබීය. හම්බන්තොට දිස්ත්‍රික්කයේ ලු‍ණුගම්වෙහෙර කොට්ඨාසයේ කැන්දගස්මන්කඩ ගම්මානයේ පිහිටුවන මෙම ව්‍යාපෘතියට, ප්‍රජා මධ්‍යස්ථානයක්, සෞඛ්‍ය මධ්‍යස්ථානයක්, කෘෂිකාර්මික මධ්‍යස්ථානයක් සහ ක්‍රීඩා මණ්ඩපයක් ඇතුළත් වන අතර  ඒ සඳහා වැයවන මුදල රුපියල් මිලියන 60කට අධිකය.

 ව්‍යාපෘතිය ආරම්භ කිරීමේ උත්සවයට ප්‍රධාන ආරාධිත අමුත්තා ලෙස සහභාගී වූයේ ශ්‍රී ලංකාවේ චීන තානාපති චී. ජෙන්හොන් මහතාය. හම්බන්තොට ජාත්‍යන්තර වරාය සමූහයේ කළමනාකාරීත්වය, කොළඹ ජාත්‍යන්තර බහාලු‍ම් පර්යන්තයේ (CICT) සහ නිර්මල පදනමේ නියෝජිතයෝ මෙම අවස්ථාවට එක් වූහ.

උත්සව අවස්ථාවේදී අදහස් දැක්වූ චීන තානාපති චී. ජෙන්හොන් මහතා මෙසේ පැවසීය. 

“චීනය සහ ශ්‍රී ලංකාව අතර මිත්‍රත්වය සියවස් විස්සකටත් වඩා පැරණි එකක්.  දේශීය හා ජාත්‍යන්තර තත්ත්වය කෙසේ වෙනස් වුවද එය ජාතීන් දෙකේ හදවත් තුළ ගැඹුරින් මුල්බැස තිබෙනවා. චීනය සහ ශ්‍රී ලංකාව දුෂ්කර කාලවලදී එකිනෙකාට උපකාර කර ඇති අතර අනාගතයේදීත් චීනය එසේ කිරීමට බලාපොරොත්තු වෙනවා. මීට අමතරව, දරිද්‍රතාව පිටුදැකීම සඳහා ශ්‍රී ලංකාවට සහය වීමට චීනය අපේක්ෂා කරනවා. අපේක්ෂාවේ ගම්මාන වැඩසටහන සාර්ථක ව්‍යාපෘතියක්. එමඟින් අන්‍යොන්‍ය සැබැඳියාව වැඩිදියුණු වී ගම්වාසීන්ගේ ජීවන රටාවද නඟාලනු ඇති.”

තානාපතිවරයා ගමේ ප්‍රජා මධ්‍යස්ථානයේ, ‘චීන ශ්‍රී ලංකා මිත්‍රත්ව තොරතුරු තාක්ෂණ අධ්‍යාපන මධ්‍යස්ථානය‘ ලෙස නම්  කිරීමට නියමිත තොරතුරු තාක්ෂණ විද්‍යාගාරයට, මූලික තාක්ෂණ උපකරණ ප්‍රදානය කළේය. 

ගම්මානයේ කුඩා ළමයින්ට සෙල්ලම් බඩුද  පරිත්‍යාග කරන ලදී.  ඒ අතර, HIPG සහ CICT කණ්ඩායම් විසින් ‘අපේක්ෂාවේ ගම්මාන’ සඳහා සිදු කළ  අනුග්‍රහයට සමගාමීව, ප්‍රදේශයේ පන්සලටද මුදල් පරිත්‍යාගයක් පිරිනමන ලදී.

-සටහන- චමින්ද මුණසිංහ