• බ්රේක් ගැසූ ආර්ථිකයට අයවැයෙන් නව පණක් 
• කිසිදු කොමිස් මුදලක් නොදී ආයෝජකයන්ට ආයෝජන කළ හැකි පරිසරයක් 
• ජනතාවගේ සෑම රුපිලයක්ම භාවිත කිරීමේදී දේව කාර්යයක් සේ සලකනවා
• ජපන් ව්‍යාපෘති 11 ක් චීන ව්‍යාපෘති 76 ක වැඩ නැවත පටන් අරන් 
• මන්නාරමේ මෙගාවොට් 50ක සුළං බලාගාරයකට මහා පරිමාණ ආයෝජනයක් 

අංජුල මහික වීරරත්න
ලෝක වෙළෙඳපොළේ ශ්‍රී ලංකා ව්‍යවසායකයන්ගේ කොටස අත්පත් කර ගැනීම සඳහා අවශ්‍ය සහාය දීමට සැලසුම් කර ඇති බව ජනාධිපතිවරයා පැවසීය.
තිරිංග යොදා සිර කර තිබූ ආර්ථිකය වෙනුවට තරමක නිදහස් චලනයක් ඇති ආර්ථිකයක් නිර්මාණය කිරීම සඳහා මෙවර අයවැයෙන් මුලපුරා ඇතැයිද ජනාධිපති අනුර කුමාර දිසානායක මහතා පැවසීය.
ආර්ථිකයෙහි නිදහස් චලනයක් ඇති කිරීමෙන් යම් සංවර්ධන වේගයක් අත්පත් කර ගත හැකි බව පෙන්වා දුන් ජනාධිපතිවරයා ඊට සරිලන පරිදි ආර්ථිකයට විශාල කම්පනයක් නොදැනෙන ලෙස' අයවැය සකස් කළ බවද කීය.
දිසානායක මහතා මෙසේ පැවැසුවේ, කොළඹ ෂැංග්‍රිලා හෝටලයේ පෙරේදා (10) පැවති තරුණ ලාංකේය ව්‍යවසායක මණ්ඩලයේ 26 වැනි සමුළුවේදීය.

තානාපතිවරුන් සහ ව්‍යවසායකයන් ඒකාබද්ධ කිරීමේ ක්‍රියාවලියක් යටතේ ලෝක වෙළෙඳපොළ තරණය කිරීමට ශක්තිමත් වැඩපිළිවෙළක් ආණ්ඩුව සතු බවද ජනාධිපතිවරයා පෙන්වා දුන්නේය.
ආර්ථිකය පිළිබඳ තීන්දු තීරණ ගැනීමේදී රුපියලට දරා ගත නොහැකි තෙරපුමක් ඇති නොවන සේ කටයුතු කිරීමට වත්මන් රජය සංවේදී වූ බව කී ජනාධිපතිවරයා ජාත්‍යන්තර මූල්‍ය අරමුදලේ නිර්දේශවලට අනුකූලවද යම් යම් තීන්දු ගැනීමට සිදු වූ බව සදහන් කළේය.
ආර්ථික පිළිබඳ විශ්වාසය බිඳ වැටුණු රාජ්‍යයක එම විශ්වාසය යළි ඇති කිරීම සඳහා වත්මන් රජය නිවැරැදි තීන්දු තීරණ ගෙන ඇතැයිද බංකොලොත් වූ රාජ්‍යය නිල වශයෙන් බංකොලොත්භාවයෙන් මුදා ගැනීමට හැකි වී යැයි ද ජනාධිපති අනුර කුමාර දිසානායක මහතා අනාවරණය කළේය.
ජනතාවගේ සෑම රුපියලක්ම භාවිත කිරීමේදී දේව කාර්යයක් ලෙස සලකා කටයුතු කරන බවට තම රජය සහතික වන බවද ජනාධිපතිවරයා මෙහිදී අවධාරණය කළේය.
ජපන් රජයෙන් නවතා තිබූ ආර්ථිකමය වශයෙන් වැදගත් වන' ව්‍යාපෘති 11ක සහ චීන රජයෙන් නවතා තිබූ ව්‍යාපෘති 76ක වැඩ රජය ගෙන යන ආර්ථික වැඩපිළිවෙළ නිසා නැවත ආරම්භ කිරීමට කටයුතු කර ඇතැයි ද ජනාධිපතිවරයා කීය.
සැලකිය යුතු ප්‍රමාණයකින් ආර්ථික ස්ථායිත්වයක් ආයෝජකයන් වෙත ලබා දීමට වත්මන් රජය මේ වන විටත් කටයුතු කර ඇතැයි අනුර දිසානායක මහතා පැවසීය.
මන්නාරමේ මෙගාවොට් 50ක සුළං විදුලි බලාගාරයක් ඉදිකිරීමටත්, පුනර්ජනනීය බල ශක්තිය වෙනුවෙන් මහා පරිමාණ ආයෝජන රැගෙන ඒමටත් වත්මන් රජයට හැකි ව තිබෙන බව පැවසූ ජනාධිපතිවරයා ආයෝජකයන්ට කිසිදු කොමිස් මුදලක් ලබා දීමෙන් තොරව ආයෝජනය කළ හැකි පරිසරයක් නිර්මාණය කර ඇතැයි පෙන්වා දුන්නේය.
එසේම, තරුණ ව්‍යවසායකයන්ට ශ්‍රී ලංකාවේ පමණක් නොව ජාත්‍යන්තර වෙළෙඳපොළ තුළටත් පියමං කිරීමට අවශ්‍ය ශක්තිය ලබා දීමට වත්මන් රජය සූදානම් බවද ජනාධිපතිවරයා කියා සිටියේය.
ලංකාවේ ප්‍රබලතම දේශපාලන ස්ථාවරත්වය සහිත පාලනය සිය රජය විසින් ගොඩනඟනු ලැබ තිබෙන බව ප්‍රකාශ කළ ජනාධිපතිවරයා, මෙතෙක් කල් බිහි වූ පාර්ලිමේන්තු තුළ මෙරට පුරවැසියා දුටුවේ වරෙක විපක්ෂය නියෝජනය කරන මන්ත්‍රීවරයා පසුව ආණ්ඩු පක්ෂය නියෝජනය කිරීමත්, වරෙක ආණ්ඩුව නියෝජනය කරන මන්ත්‍රීවරයා හිටි හැටියේ විපක්ෂය නියෝජනය කිරීමත් වැනි තත්වයන් බව පැවසීය.
එවැනි තත්වයක් වත්මන් පාර්ලිමේන්තුවේ නොමැති බව පෙන්වා දුන් ජනාධිපතිවරයා ආණ්ඩුව හා විපක්ෂය යනුවෙන් නිශ්චිත වෙන්වීමක් ඇති බවද පෙන්වා දුන්නේය.
එය දේශපාලන ස්ථාවරභාවය පෙන්වීමට හොඳම නිදසුනක් බවද ජනාධිපති අනුර කුමාර දිසානායක මහතා පැවසීය.
ආදර්ශවත් දේශපාලනයක් ශ්‍රී ලංකාවේ මේ වන විට ආරම්භ කර ඇති බවද ජනාධිපති අනුර කුමාර දිසානායක මහතා මෙහිදී සිහිපත් කළේය.
එබැවින් වත්මන් රාජ්‍ය පාලනය අවසානයේදී විනාශකාරී දේශපාලනයක් නැවත ඇති නොවන බව ජනාධිපති අනුර කුමාර දිසානායක මහතා මෙහිදී තහවුරු කර සිටියේය.