• බදු නිදහස් කිරීම් ලබාදීමේ රාමුව, 2026 අයවැය ගැනත් සාකච්ඡා

විමුක්ති එස් රුද්‍රිගු

ජාත්‍යන්තර මූල්‍ය අරමුදලේ පස්වැනි සමාලෝචනය මෙම සතියේදී අවසන් වීමට නියමිතව තිබෙන බවත් එම කාලයේදී කාර්ය මණ්ඩල එකඟතාවකට පැමිණීමට නොහැකි වුවහොත් මෙරටදී හෝ ඇමෙරිකාවේදී ජාත්‍යන්තර මූල්‍ය අරමුදල සමග සාකච්ඡා කිරීමට හැකියාව පවතින බවත් ආරංචි මාර්ග ප්‍රකාශ කළේය.

මෙරටට ජාත්‍යන්තර මූල්‍ය අරමුදල ලබාදී ඇති අරමුදල් වැඩසටහන 2027 වසරේ නොවැම්බර් මාසයේදී අවසන් වීමට නියමිතව තිබෙන බවද ආරංචි මාර්ග පැවැසුවේය.

ශ්‍රී ලංකාවට පැමිණි ජාත්‍යන්තර මූල්‍ය අරමුදලේ නියෝජිත කණ්ඩායම පස්වැනි සමාලෝචනයේදී මීළඟ මාස 12 ඉලක්ක පිළිබඳව බලධාරීන් සමග සාකච්ඡා කළ බවත් එලෙස සාකච්ඡා කළ කරුණු අතර බදු නිදහස් කිරීම් ලබාදීමේ රාමුව, 2026 අයවැය තිබූ බවත් ආරංචි මාර්ග ප්‍රකාශ කළේය. ලබන වසරේ අයවැය සකස් කිරීමෙන් අනතුරුව එය ජාත්‍යන්තර අරමුදලේ වැඩසටහනට අනුකූලදැයි සොයා බැලීම සඳහා එම අරමුදල ඇගයීමක් සිදුකරනු ඇති බවද ආරංචි මාර්ග පැවැසුවේය.

පසුගිය පෙබරවාරි මාසයේදී මෙරට වාහන ආනයන සීමා ඉවත් කිරීමෙන් පසුව මෙරට වාහන ඉල්ලු‍ම විශාල ලෙස ඉහළ ගිය බවත් වාහන ඉල්ලු‍ම අඩුවීමෙන් පසුවද රජයේ ආදායම නොවෙනස්ව පවතිනු ඇතැයි තමන් අපේක්ෂා කරන බවත් ආරංචි මාර්ග ප්‍රකාශ කළේය. 

මෙරට ණය ප්‍රතිව්‍යූහගතකරණය නිවැරදි දිශාවට ගමන් කරන බවත් එය ඉක්මනින් අවසන් විය යුතු බවත් ආරංචි මාර්ග ප්‍රකාශ කළේය. 

කෙසේ නමුත් බදු නිදහස් කිරීම් ලබාදිය යුත්තේ ඉතාමත් සැලකිලිමත් බවත් ඒ සඳහා වන රාමුව සකස් කෙරෙන පනත් කෙටුම්පත ඉතාමත් ඉක්මනින් පාර්ලිමේන්තුවට ඉදිරිපත් වනු ඇති බවත් ආරංචි මාර්ග පැවැසුවේය. ඒ පිළිබඳව ජාත්‍යන්තර මූල්‍ය අරමුදලේ විධායක කමිටුව පස්වැනි සමාලෝචනය පිළිබඳව  සලකා බලන අවස්ථාවේදී විමසීමට ලක් කරනු ඇති බවද ආරංචි මාර්ග ප්‍රකාශ කළේය.