විමුක්ති එස් රුද්‍රිගු

ගියවර අයවැයේ රජයේ අදායම් ඉලක්ක සියයට 99 කට ආසන්න ප්‍රමාණයක් ශ්‍රී ලංකාව සපුරාගෙන තිබෙන බවත් මෙම වසරේද රජයේ අදායම් ඉලක්ක සපුරා ගැනීමට ජාතික ජන බලවේග රජය බලාපොරොත්තු වන බවත් මුදල් නියෝජ්‍ය අමාත්‍ය ආචාර්ය හර්ෂණ සූරියප්පෙරුම මහතා ඊයේ(19) කොළඹ ෂැන්ග්‍රිලා හෝටලයේ පැවැති ආසියානු සංවර්ධන බැංකුවේ දැනුවත් කිරීමේ වැඩසටහනකදී ප්‍රකාශ කළේය. ආර්ථික ස්ථාවර කිරීම සඳහා රටක හරිත මූල්‍යකරණය දියුණු කිරීම ඉතා වැදගත් බවත් එයට කොටස් කීපයක් අවශ්‍ය බවත් මුදල් නියෝජ්‍ය අමාත්‍යවරයා පැවැසුවේය. ස්ථාවරත්වය ඉන් එක කොටසක් බවද මුදල් නියෝජ්‍ය අමාත්‍ය ආචාර්ය හර්ෂණ සූරියප්පෙරුම මහතා පැවැසුවේය.

තිරසාර මූල්‍යකරණයකට ව්‍යාපාරික හරිත පද්ධතිය දියණු කිරීමට ඉතා වැදගත් යන තේමාව යටතේ පැවති මෙම දැනුවත් කිරීමේ වැඩසටනට මුදල් නියෝජ්‍ය අමාත්‍ය ආචාර්ය හර්ෂණ සූරියප්පෙරුම,ආසියානු සංවර්ධන බැංකුවේ මෙරට නේවාසික අධ්‍යක්ෂක ටකෆුමි කඩානෝ ටකෆුමි කඩානෝ මහත්වරු ඇතුළු සම්භාවනීය අමුත්තෝ රැසක් සහභාගී වූහ.

ස්ථාවරත්වය පිළිබඳ කතා කරනවිට එයට දේශය සඳහා වන තිරසාර මූල්‍යකරණ විසඳුම් අයත් වන බව නියෝජ්‍ය අමාත්‍යවරයා පැවැසුවේය. එම විසඳුම් සාර්ථක අයුරින් වර්ධන කර ගැනීමට ස්ථාවර හරිත මූල්‍ය පද්ධතියක් අවශ්‍ය වන බවත් ස්ථාවරත්වය යන්නෙන් දේශපාලන ස්ථාවරත්වය, සමාජීය ස්ථාවරත්වය, ප්‍රතිපත්තිවල අඛණ්ඩතාව, ව්‍යාපාරවලට අනාගතය දෙස බලමින් පුරෝකථනය කළ හැකිවීම සහ සැලසුම් කිරීම අදහස් කරන බවත් මුදල් නියෝජ්‍ය අමාත්‍ය ආචාර්ය හර්ෂණ සූරියප්පෙරුම මහතා ප්‍රකාශ කළේය. නව රජය රට අරාජික කරනු ඇතැයි ඇතැම් පාර්ශ්ව බලාපොරොත්තුව වූ බවත් නමුත් රජය රට අරාජික කරනවා වෙනුවට ස්ථාවර කළ බවත් නියෝජ්‍ය අමාත්‍යවරයා සඳහන් කළේය.