ෆේස්බුක් හා ට්විටර් යන ලෝකයේ ජනප්‍රියතම සමාජ ජාල වෙබ් අඩවි හිමිකරුවන්ට අයිඑස් ත්‍රස්ත සංවිධානය අනතුරු අඟවා ඇතැයි විදෙස් පුවත් සේවා පවසයි.

වීඩියෝවක් ඔස්සේ එසේ අනතුරු අඟවමින් ෆේස්බුක් නිර්මාතෘ මාර්ක් සකර්බර්ග්ගේ හා ට්විටර් ප්‍රධානී ජැක් ඩෝර්සි ගේ අවසානය සටහන් කරන බව අයිඑස් ත්‍රස්තයෝ කියති.

මේ මස මුලදී ලෝක ත්‍රස්තවාදය වැළැක්වීමේ පනත යටතේ ත්‍රස්ත ක්‍රියාවන්ට දායකත්වය සපයන හා සම්බන්ධ ට්විටර් ගිණුම් 1,25,000 ක් පමණ අත්හිටුවීමට ට්විටර් ප්‍රධානීහු කටයුතු කර ඇත.

එමෙන්ම ෆේස්බුක් සමාගම ද අයිඑස් ත්‍රස්තයන්ට සම්බන්ධ ෆේස්බුක් පිටු විශාල ප්‍රමාණයක් අත්හිටුවීමටත් සිරියා හා ඉරාකයේ ත්‍රස්තවාදයට සම්බන්ධ ෆේස්බුක් පිටු හා ගිණුම් විශාල ප්‍රමාණයක්ද ඉවත් කිරීමට කටයුතු කළේය.

එම ගිණුම් හා පිටු මගින් අයිඑස් සංවිධානයට සාමාජිකයන් බඳවා ගැනීම, ආධාරකරුවන් දැනුම්වත් කිරීම ආදිය සිදුකර ඇතැයි කියති. එම කටයුතු අඩාල වීම නිසා මේ සම්බන්ධයෙන් විරෝධය පළකරමින් අයිඑස් ත්‍රස්තයන් එම සමාගම්වල ප්‍රධානීන් දෙදෙනා මරා දමන බවට අනතුරු අඟවා ඇත.

බෘෘකින්ග්ස් ආයතනය නිකුත් කළ අධ්‍යයන වාර්තාවකින් පෙන්වා දෙන්නේ අයිඑස් සංවිධානයේ සහායකයින් පසුගිය 2015 වසරේ මාර්තු මාසයේ සිට ට්විටර් ගිණුම් 46,000ක් ආරම්භ කර ඇති බවයි.