2016 ඇමරිකා ජනාධිපතිවරණයට ඩෙමොක‍්‍රටික් පක්ෂ අපේක්ෂිකාව ලෙස ඉදිරිපත් වන්නේ හිලරි ක්ලින්ටන් බව මේ වන විට නිල වශයෙන් නිවේදනය කර තිබේ.

තම ට්විටර් ගිණුමේද මේ සම්බන්ධයෙන් සටහනක් තබා තිබූ හිලරි ක්ලින්ටන් එහි සඳහන් කර තිබුණේ පක්ෂයේ ජනාධිපති අපේක්ෂිකාව ලෙස තමන් තෝරාගෙන ඇති බවත් ඇමරිකාවට දැන් අවශ්‍යව ඇති වීරවරිය තමා යැයි තමන් සිතන බවත්ය.

එළැඹෙන සති කිහිපයේදී අයෝවා ප‍්‍රාන්තයෙන් ඇයගේ මැතිවරණ ප‍්‍රචාරණ කටයුතු ආරම්භ කිරීමට සැළසුම් කර තිබෙන බව එම කටයුතු භාර නිළධාරීන් පවසයි.

එම කටයුතු සදහා දැනට වෙන්කර ඇති මුදල ඩොලර් බිලියන 2.5 කි.

ඇය ජනාධිපතිවරණයට ඉදිරිපත් වන්නේ ඇමරිකාවේ මධ්‍ය පාන්තිකයින් බල ගැන්වීම තම ප‍්‍රචාරණ තේමාව කරගනිමිනි. වර්තමාන ඇමරිකා සමාජයේ වැඩි බලයක් හිමිකරගෙන සිටින්නේ මධ්‍යම පාන්තිකයින් වීම මිට හේතුවයි.

ජයගතහොත් ඇය ඇමරිකාවේ ප‍්‍රථම ජනපතිනිය වනු ඇත. දැනට අවුරුදු 68 ක් වයස් වන ඇය එදා මෙදා තුර ඇමරිකාවේ ජනපතිධූරය හෙබවූ වයස්ගතම ජනපතිවරු අතරින් කෙනෙකුද වනු ඇත.

කෙසේවුවද හිලරි ක්ලින්ටන්ගේ මැතිවරණ ප‍්‍රචාරණ කටයුතු පටන් ගත් තැනම වරද්දා ගත් ලකුණු පෙනුනේ ඇය තමන් පිළිබද වීඩියෝවක් අන්තර්ජාලයට එක්කරන බවට පොරොන්දුවක්දී එම පොරොන්දු වූ කාලයට වඩා පැය 3 ක් පමණ ප‍්‍රමාදව එම වීඩියෝව නිකුත් කිරීමත් සමගය. වීඩියෝව නිකුත් කෙරෙන තෙක් බලා සිටි මාධ්‍ය ආයතන හා ඇයගේ ආධාරකරුවන්ට එ නිසා සිදුවූයේ නිකරුණේ  කල්මැරීමටය.

ඇය තරග වදින ඩිමොක‍්‍රටික් පක්ෂයේම ඇයට ඇත්තේ හොඳ නමක් නොවේ. ඩිමොක‍්‍රටික් පක්ෂ සාමාජිකයෙකු වන වත්මන් ජනපති බැරක් ඔබාමා හා ඇය අතර සීතල යුද්ධයක් ඇති බව ප‍්‍රකට කරුණකි. එමෙන්ම ඇමරිකා රාජ්‍ය ලේකම් ලෙස කටයුතු කළ සමයේ ඇය අනුගමනය කළ විදේශ ප‍්‍රතිපත්තිය නිසා ඇමරිකාවට අන්තර්ජාතික තලයේ හිමිව තිබූ ගරුත්වය මේ වන විට වියැකී ගොස් තිබෙන බවද බොහෝ දෙනා කියන්නකි.

ඇය රාජ්‍ය ලේකම්ධූරය හෙබවූ සමයේ රුසියාව තවත් ශක්තිමත් වීමත්,ඊශ‍්‍රායෙලය හා ඇමරිකාවේ සබඳතා බිඳ වැටීමත්,මැදපෙරදිග තත්ත්වය තවත් අවුලෙන් අවුලට පත්වීමත් ඊට උදාහරණ ලෙස ඔවුන් පෙන්වාදේ.

හිටපු ජනපතිවරයෙක් වූ ඇයගේ සැමියා වන බිල් ක්ලින්ටන්ට එරෙහිව වංචා හා දුෂණ චෝදනා නැගෙද්දී, ඔහුගේ පෞද්ගලික සහායිකාව හා අයථා සම්බන්ධතා පවත්වා ඇතැයි තොරතුරු හෙළිවෙද්දී ඔහු අතනොහැර ඔහු සමගම සිටි නිසා ඇයට ඇමරිකා සමාජයේ යම් ගරුත්වයක් හිමිව ඇතත් එසේයැයි කියා රාජ්‍ය තාන්ති‍්‍රක කටයුතු වල යෙදීමට ඇයට කිසිදු සුදුසුකමක් නැතැයි ඇමරිකා මාධ්‍ය කිහිපයක්ම අදහස් පළ කර තිබේ.

හිලරි ක්ලින්ටන් ඩිමොක‍්‍රටික් පක්ෂයේ ජනාධිපති අපේක්ෂිකාව ලෙස පත්ව සිටින බව ඇසීම ප‍්‍රතිවාදී රිපබ්ලිකන් පක්ෂය උද්දාමයට පත්කිරීමට සමත්ව තිබෙන්නක් බව පෙනේ. එම පක්ෂය දැනටමත් ඇයව පතුරු ගැසීම පටන්ගෙන ඇත.

හිලරි තමන් ජනාධිපති ලෙස පත්වීමට සුදුසු බව පෙන්වනු ඇත්තේ කෙසේදැයි බලාගැනීමට තවත් දින කිහිපයක් ඉවසීමට සිදුවනු ඇත. ඇයට නැගී තිබෙන චෝදනා වලට සාර්ථක පිළිතුරු ලබාදීමට හා වියැකී යමින් තිබෙන ඇයගේ කීර්තිය යළි ගොඩනගා ගැනීමට ඇයට දියත් කිරීමට සිදුවනු ඇත්තේ සුලූපටු මෙහෙයුමක් නොවන බව නම් පැහැදිලිය.