වසර 700ක් අත්වැල් බැඳගෙන සිටි යුවලකගේ ඇටසැකිලි දෙකක් එංගලන්තයේ ලෙස්ටර්ෂයර්හි දේවස්ථාන භූමියකින් හමුවී ඇත. හැල්න්ටන්හි ශාන්ත මොරෛල් දේවස්ථානය ලෙස හැඳින්වෙන මේ දේවස්ථානය 14 වැනි සියවසේ සිට පූජනීය ස්ථානයක්ව පැවතිණි.  දේවස්ථානය ඉදිකැර ඇත්තේ පැරණි රෝමානු ගොඩනැගිල්ලක් මතයැයි ද විශ්වාසයක් පවතී.

පුරාවිද්‍යාඥයන් පවසන්නේ මේ ඇටසැකිලි දෙකම එකම වයසකට අයත් වූවන් දෙදෙනකුගේ යැයි පෙනෙන බවයි. කෙසේ වෙතත් ඔවුන් දෙදෙනා මිය යන අවස්ථාවේ කවර වයසකට අයත් වූවේ ද යන්න මෙතෙක් තහවුරු කැරගෙන නැත. එය දැනගැනීමට තවත් පර්යේෂණ කළ යුතුයැයි ලෙස්ටර්ෂයර් විශ්වවිද්‍යාලයේ පුරාවිදයාඥයකු වූ විකී ස්කෝරේ පවසයි.

දේවස්ථානයේ කැණීමෙන් තවත් සිරුරු නමයක් හමුවී ඇත. ඒවා සියල්ල එකම කාලයකට අයත් බව ද සොයාගෙන තිබේ. ඉන් එක් වැඩුණු පිරිමියකුගේ ඇටසැකිල්ලක තියුණු ආයුධයකින් හිසට පහරක් වැදී ඇති බවට සළකුණු ඇතැයි ද පුරාවිද්‍යාඥයෝ කියති. තවත් පිරිමි ඇටසැකිල්ලක දෙකකුල් පපුව අසළට එසැවී තිබී ඇත.

කැණීමේ දී 11-15 වැනි සියවස්වලට අයත් රිදී පැන්ස හමුවූ බවත් මේ ස්ථානයේ තිබූ පැරණි ගොඩනැගිල්ලක ගඩොල් අතුරන ලද පොළොව හමුවූ බවත් පර්යේෂකයෝ කියති.