ඇමෙරිකාවේ හිටපු ජනපතිවරයකු වූ ජෝර්ජ් එච්. ඩබ්ලිව්. බුෂ් බ්‍රොන්කයිටීස් රෝගය වැළඳීම හේතුවෙන් ඉකුත් 30 වැනිදා හුස්ටන් නුවර රෝහලකට ඇතුළු කළ අතර දැන් ඔහු සුවවෙමින් සිටින බව විදෙස් මාධ්‍ය වාර්තා සඳහන් කරයි. හිටපු ජනාධිපතිවරයාගේ රෝගී තත්ත්වය යහපත් මට්ටමකට තිබෙන බව කී වෛද්‍ය ජිම් මැක්ග‍්‍රාත් මේ සතිය අවසානයේදී ඔහුට රෝහලෙන් පිටත්ව යෑමට හැකි වනු ඇතැයි ද පැවැසීය. බුෂ් රෝහල් ගත කළ බව දැනගත් සැණින් ඔහුගේ පුත් හිටපු ජනපති ජෝර්ජ් ඩබ්. බුෂ් සිය බිරිඳ ලෝරා සමඟ රෝහලට පැමිණි බව මාධ්‍ය වාර්තා සඳහන් කරයි. අසූඅට වන වියේ පසුවන බුෂ් 1989 සිට 1993 දක්වා ඇමෙරිකා එක්සත් ජනපදයේ ජනපති පදවිය හෙබවීය. ඉරාක ජනපති සදාම් හුසේන් කුවේටය ආක‍්‍රමණය කළ අවස්ථාවේදී ඇමෙරිකා හමුදා ඉරාකයට යවන ලද්දේ හිටපු ජනපති බුෂ් විසිනි. ඇමෙරිකා උප ජනපති ලෙස ද කටයුතු කර ඇති ජනපති බුෂ් කොංග‍්‍රස් මණ්ඩල සාමාජිකයකු ලෙසත් සී.අයි.ඒ බුද්ධි අංශයේ අධ්‍යක්ෂකවරයා ලෙසත් කටයුතු කර ඇත.