ඇමෙරිකාව සිරියාවට පහරදීමක් කළොත් එම සටනට සිරියානු රජයට සහාය පළ කරන රුසියාව ඊට මැදිහත් නොවනු ඇතැයි ඇමෙරිකානු රාජ්‍ය ලේකම් ජෝන් කෙරී කියා සිටී.

ඇමෙරිකා රාජ්‍ය ලේකම් මේ බව කියා සිටියේ රුසියානු විදේශ ඇමැති පෙරේදා (4) කළ ප‍්‍රකාශයක් ද උපුටා දක්වමිනි. රුසියානු විදේශ ඇමැති සර්ගේ ලැව්රොෆ් අවධාරණය කර තිබුණේ සිරියා අර්බුදය මුල්කොට ගනිමින් යුද්ධයකට පැටලීමට රුසියාව සූදානම් නැති බවය.

රුසියානු ජනාධිපති ව්ලැඩිමීර් පුටින් පවසා ඇත්තේ, සිරියාවට එරෙහිව හමුදා කි‍්‍රයා මාර්ගයක් ගැනීමට පෙර, සිරියාවේ සිදුවුණු එම විස වායු ප‍්‍රහාරය එරට රජය විසින් කළ බව සාක්ෂි සහිතව ඔප්පු කළ යුතු කියාය.

එක්සත් ජාතීන්ගේ ආරක්ෂක මණ්ඩලයේ අනුමැතියකින් තොරව සිරියාවට පහර දීමක් නොකරන ලෙසටත්, විස වායු ප‍්‍රහාරයට එරට රජය සම්බන්ධදැයි ස්ථිරව දැනගන්නා තුරු ඉවසීමෙන් කටයුතු කළ යුතු බවටත් එක්සත් ජාතීන්ගේ මහ ලේකම් බෑන් කී මූන් ද ඇමෙරිකාවෙන් ඉල්ලා ඇත.

සිරියාවේ සිදුවුණු එම විස වායු ප‍්‍රහාරයෙන් 1,429 දෙනෙක් ජීවිතක්ෂයට පත්වූහ. විස වායුව නිසා රෝගී වූ ගණන 4,000 කි. වායු ප‍්‍රහාරය එල්ල වූ සැණින්, ඇමෙරිකාවේ සහාය ලබන සිරියානු කැරැලිකරුවන් සහ විපක්ෂ කණ්ඩායම් චෝදනා කළේ පහර දීම කළේ සිරියානු ජනපති අසාද්ගේ රජය කියාය. එම චෝදනා සිරියානු රජය තරයේ ප‍්‍රතික්ෂේප කළේය.

බොහෝ දේශපාලන විචාරකයන් බිය පළ කරන්නේ සිරියානු අර්බුදය මුල් කොට ගනිමින් තෙවැනි ලෝක යුද්ධය ඇරැඹේවි කියාය. රුසියාව සහ ඉරානය සිරියානු රජයට සහාය දක්වයි.

රුසියාව සිරියානු රජයට සහාය දක්වන්නේ රුසියානු නාවික කඳවුරක් සිරියාවේ පිහිටුවා තිබීම නිසාය. රුසියාව මැද පෙරදිග කලාපයේ බලය රඳවා ගෙන සිටින්නේ එම කඳවුර නිසාය.

කෙසේ නමුත් මේ වනවිට රුසියානු යුද නැව් දෙකක් සිරියාව අසල මධ්‍යධරණී මුහුදු සීමාවට සේන්දු වී ඇති බව ද වාර්තා වේ.

රුසියාව, එම යුද නැව් සිරියාව අසල මධ්‍යධරණී මුහුදට පිටත් කර හැරියේ, සිරියාවට හමුදා ප‍්‍රහාරයක් එල්ල කරන බව පවසමින් ඇමෙරිකාව ඔවුන්ගේ යුද නැව් මධ්‍යධරණී මුහුදට යැවීමට පියවර ගෙන ඇති නිසාය.
 

ඇමෙරිකා රාජ්‍ය ලේකම් ජෝන් කෙරී