එක්සත් ජාතීන්ගේ ආරක්ෂක මණ්ඩලය හරහා සිරියාවට එරෙහිව යෝජනාවලියක් සම්මත කර ගැනීමට නොහැකි නම්, ආරක්ෂක මණ්ඩලයේ අනුමැතියකින් තොරව, සිරියාවට පහර දෙනවා යැයි ඇමෙරිකාවත් බි‍්‍රතාන්‍යයත් අනතුරු අඟවමින් කියා සිටී.

සිරියාවට එරෙහිව හමුදාමය මැදිහත්වීමක් කළ යුත්තේ සිරියානු රජය රසායනික අවි යොදා ගනිමින් අහිංසක සිවිල් වැසියන් සමූල ඝාතනය කිරීම නැවැත්වීමට යැයි ද ඇමෙරිකාව සහ බි‍්‍රතාන්‍යය පෙන්වා දෙයි.

මෙම අනතුරු ඇඟවීමට ප‍්‍රතිචාර දක්වමින් සිරියානු ජනපති බෂීර් අල් අසාද්ගේ රජය කියා සිටින්නේ, ඇමෙරිකාවෙන් තම රටට ප‍්‍රහාරයක් එල්ල වුවහොත් ලෝකයා පුදුමයට පත් කරන අන්දමින් ඊට ප‍්‍රතිප‍්‍රහාර දැක්වීමට සූදානම් බවය.

නේටෝ සාමාජික රාජ්‍යයක් වන ඉතාලිය කියා සිටින්නේ එක්සත් ජාතීන්ගේ ආරක්ෂක මණ්ඩලයේ අනුමැතියෙන් තොරව හෝ නේටෝ හෙවත් උතුරු අත්ලාන්තික් ගිවිසුම් සංවිධානයේ අනුමැතියකින් තොරව හෝ ඇමෙරිකාව සිරියාවට පහර දෙන්නේ නම් තමන් ඊට සම්බන්ධ නොවන බවය.

ඇමෙරිකාවට සහාය දක්වමින් ඊශ‍්‍රයාල රජය වෙනුවෙන් එරට ජ්‍යෙෂ්ඨ නියෝජිත පිරිසක් පෙරේදා (27) ඇමෙරිකාවේ වොෂින්ටන් නුවරදී ඇමෙරිකා ආරක්ෂක අංශ ප‍්‍රධානීන් හමුවී සිරියාවට පහර දීමක් කරන්නේ නම් එය කෙසේ කළ යුතු දැයි යන්න ගැන දීර්ඝ වශයෙන් සාකච්ඡුා කළහ.

ඇමෙරිකාව සහ බි‍්‍රතාන්‍යය තරයේ කියා සිටින්නේ ඉකුත් 21 වැනිදා සිරියාවේ සිදුවුණු සෙරීන් විස වායු ප‍්‍රහාරයට සිරියානු රජයේ හමුදා වගකිය යුතු බවය. කෙසේ නමුත් ඒ ගැන සාක්ෂි අවශ්‍ය බව ද ඇමෙරිකා ජනපති ඔබාමා අවධාරණය කර ඇත. එම ප‍්‍රහාරය එල්ල කළේ කවුදැයි සෙවීමේ පරීක්ෂණ මේ වනවිට සිදුවෙමින් පවතී. පරීක්ෂණ පවත්වන්නේ එක්සත් ජාතීන්ගේ විශේෂ පරීක්ෂණ කණ්ඩායමකි.

සිරියානු රජයට සහාය පළ කරන ඉරානයත් රුසියාවත් කියා සිටින්නේ, විස වායු ප‍්‍රහාරය නිමිත්තක් කර ගනිමින් ඇමෙරිකාව සහ බි‍්‍රතාන්‍යය ලිබියාවට කලාක් මෙන් සිරියාවට ද පහරදීමක් කිරීමට සැරසෙන බවය.

ලිබියාව අස්ථාවර වූයේත්, ලිබියා නායක කර්නල් මුවම්මාර් ගඩාෆි ඝාතනය වූයේත් ඇමෙරිකාව, බි‍්‍රතාන්‍යය සහ ප‍්‍රංශය එක් වී එක්සත් ජාතීන්ගේ ආරක්ෂක මණ්ඩලය හරහා ලිබියාවට එරෙහිව යෝජනාවක් සම්මත කර ගෙන නේටෝ ලවා ලිබියාවට ගුවන් ප‍්‍රහාර එල්ල කිරීමෙන් පසුවය.

සිරියානු කැරැුලිකරුවන්ට සහ විපක්ෂ කණ්ඩායම්වලට සහාය පළ කරමින්, සිරියාවට එරෙහිව ද ඒ අයුරින්ම යෝජනා සම්මත කර ගැනීමට අවස්ථා කිහිපයකදී ඇමෙරිකාව, බි‍්‍රතාන්‍යය සහ ප‍්‍රංශය උත්සහ කළේය. එහෙත් ආරක්ෂක මණ්ඩලයේ සෙසු සාමාජික රටවල් වන රුසියාව සහ චීනය නිෂේධ බලය භාවිතා කොට ඊට විරුද්ධ විය.
 

සිරියාවට පහරදීමේ අරමුණින් මධ්‍යධරණී මුහුදට සේන්දු වූ ඇමෙරිකා යුද නැව්