සිරියා ජනපති බෂීර් අල් අසාද්ගේ රජයට එරෙහිව සටන්වැද සිටින කැරැලිකාර පාර්ශවය ඊයේ(3) එරට රකා පළාතේ පිහිටි සිරකඳවුරක් අත්පත් කරගෙන එහි සිටි රැඳවියන් සිය ගණනක් නිදහස් කළේය.
රකා පළාතේ බලය ගිලිහීම නිසා රජයේ හමුදා පසුබසිමින් සිටින මොහොතකදී කැරැලිකරු වෝ මෙම සිරකඳවුර අල්ලා ගත්හ. නිදහස් කළ සිරකරුවන්ගෙන් ඇතැමෙක් යාබදව පිහිටි තාල් අබියඞ් නගරයේ ඇති අධිකරණය වෙත යොමු කළ බව කැරැලිකරුවෝ පවසති.
මෙම ගැටුම්වලදී සෙබළු 14 දෙනෙක් සහ කැරැලිකරුවෝ 16 දෙනෙක් ජීවිතක්ෂයට පත්වූහ. 
සිරියා රජයට එරෙහිව ගැටුම් උත්සන්නවූ පසු රකා පළාතේ සිදුවූ දරුණුතම ගැටුම මෙය ලෙස සැලකේ. මේ වනවිට එම ප‍්‍රදේශයේ බලය තහවුරු කරගෙන සිටින කැරැලිකරුවෝ නිරන්තරයෙන් දේශසීමාබද ප‍්‍රදේශවල සිටින ආරක්ෂක අංශ සාමාජිකයන් ඉලක්ක කරගෙන ප‍්‍රහාර එල්ල කරති.
ජනපති අසාද්ගේ හමුදා හා කැරැලිකරුවන් අතර පෙරේදා හටගත් ගැටුම්වලින් 156 දෙනෙක් ජීවිතක්ෂයට පත්වූ බව මානව හිමිකම් සංවිධාන පවසයි. එක්සත් ජාතීන්ගේ සංවිධානයේ අලූත්ම වාර්තාවලට අනුව සිරියාවේ ගැටුම් නිසා මියගිය ගණන 70,000 තෙක් ඉහළ ගොස් ඇත. සිරියානු අර්බුදය විසඳීමට තවමත් හැකියාවක් ලැබී නැත්තේ, ලෝකයේ රටවල් බල කඳවුරු දෙකකට බෙදී සිටීමය.
 ඇමෙරිකාව ප‍්‍රමුඛ බටහිර රටවල් සිරියානු කැරැලිකරුවන්ට සහාය දෙද්දී ඉරානය, චීනය සහ රුසියාව බලයෙන් ඉවත් වීම ප‍්‍රතික්ෂේප කරන සිරියානු ජනපති බෂීර් අල් අසාද්ගේ රජයට සහාය පළ කරයි.