තමන් සොරාගත් බඩුබාහිරාදිය නැවත හිමිකරුවන්ටම භාරදීමට කටයුතු කළ සොරමුලක් ගැන වාර්තා වන්නේ ඇමරිකාවේ කැලිෆෝර්නියා ප‍්‍රාන්තයේ සාන්ත බර්නාඩිනෝ ප‍්‍රදේශයෙනි.

සාන්ත බර්නාඩිනෝහි ලිංගික අඩත්තේට්ටම් වලට ලක්වූවන් වෙනුවෙන් පෙනී සිටිනා ලාභ නොලබන ආයතනයකට රැයේ කඩාපැන ඇති මේ සොරමුල එම ආයතනයේ තිබූ පරිගණක හා අනෙකුත් කාර්යාලීය උපකරණ සියල්ල සොරාගෙන ගොස් තිබේ.

දිනක් දෙකක් ගතවූ පසු කාර්යාලය ඉදිරිපිට සොරකම් කරනු ලැබූ පරිගණක ඇතුළු බඩු බාහිරාදිය ගොඩගසා තිබෙනු දැකගත හැකිවිය.ඒවා සමග වූයේ සොරුන් තබා ගිය සටහනකි.

‘‘අපට කිසිම අදහසක් තිබුනේ නැහැ අප මොනවද මේ සොරකම් කරන්නේ කියලා.මෙන්න ඔබේ බඩු මුට්ටු සියල්ල. පීඩාවට පත්වු මිනිස්සුන්ට පිහිට වන්නට ඔබලාට ශක්තිය ලැබේවා. දෙවි පිහිටයි‘‘ යැයි එම සටහනේ සදහන් වේ.

සොරුන් පරිගණක වල තිබූ අඩත්තේට්ටම් වලට පත්වූවන්ගේ තොරතුරු හා තම ආයතනය කි‍්‍රයාත්මක කර තිබූ ව්‍යාපෘතී ගැන තොරතුරු දැකීමෙන් මෙම තීරණයට එළැඹෙන්නට ඇතැයි ආයතනයේ අතිරේක අධ්‍යක්ෂ කැන්ඩි ස්ටාලින්ග්ස් කියයි.

සොරකම් කරනු ලැබූ බඩුබාහිරාදිය නැවත හිමිකරුවන්ටම භාරදුන් අවස්ථාවක් දැක්කාම යැයි සාන්ත බර්නාඩිනෝ පොලිසියේ ලූතිනන් පොල් විලියම්ස් පවසයි.සොර මුලක් වුවත් හෘද සාක්කියක් ඇතියවුන් පිරිසක් බව පෙනේ යැයි ඔහු කියයි.