සෝමාලියාවේ මොගඩිෂු නුවර රජයේ ගොඩනැගිල්ලකට අයත් භූමියකට පෙරේදා (04) බෝම්බයක් රැගත් මෝටර් රියක් කඩා වැදී එය පුපුරවා හැරීම නිසා පුද්ගලයන් 70 දෙනෙකුට අධික පිරිසක් ජීවිතක්‍ෂයට පත්වූ බව එරට ජනාධිපති කාර්යාලය කියා සිටී, අල්-ෂෙබාබ් ත‍්‍රස්ත සංවිධානය මෙම බෝම්බය පිපිරවීමේ වගකීම බාරගෙන ඇති අතර බෝම්බය පුපුරවා ඇත්තේ සෝමාලියාවේ අධ්‍යාපන අමාත්‍යෘංශයට අයත් ගොඩනැගිලි පිහිටි භූමියක් තුළදීය. මෙම සිද්ධිය නිසා 150 කට ආසන්න පිරිසක් තුවාල ලබා ඇතැයි ද පොලිසිය කියයි.එම භූමිය අසලම ඇති තවත් අමාත්‍යාංශ ගණනාවක ගොඩනැගිලිවලටද හානි සිදුවී ඇතැයි පවසන සෝමාලියා ජනාධිපති ෂරීෆ් ෂීක් අහ්මඞ්, එම ප‍්‍රහාරය හෙළා දකිමින් නිවේදනයක්ද නිකුත් කර තිබේ. ඉස්ලාමීය මරාගෙන මැරෙන බෝම්බකරුවකුගේ ක‍්‍රියාවක්වන මෙම පිපිරවීම සිදුවී ඇත්තේ ”කිලෝ මීටර් 4” යන ප‍්‍රදේශය තුළය. ”කිලෝ මීටර් 4” ප‍්‍රදේශයේ සිට ජනපති ෂරීෆ් ෂීක්ගේ මන්දිරයට ඇත්තේ ඉතා සුළු දුරකි. ”මෙම ප‍්‍රහාරය ගැන මම බොහෝ සෙයින් කම්පාවට පත්වී සිටිනවා. එය පිළිකුළෙන් යුතුව හෙළා දකිනවා” යැයි මොගඩිෂු ජනාධිපති ෂරීෆ් ෂීක් පැවැසීය. ”මියගිය අයගේ පවුලේ උදවිය වෙනුවෙන් මාගේ කණගාටුව ප‍්‍රකාශ කරනවා” යැයිද එම නිවේදනයේ වැඩිදුරටත් සඳහන් වෙයි.සෝමාලියාව, 1991 දී සිවිල් යුද්ධයකට පිවිසුණායින් පසු මුහුණ පෑ දරුණුම සිද්ධිය මෙය බව බෝම්බ සිද්ධිය ඇසින් දුටු අයෙක් පැවසීය.