‘සැන්ඩි’ සුළි කුණාටුවෙන් සිදුවූ හානිය දැක ගැනීමට ඇමෙරිකා ජනාධිපති බරැක් ඔබාමා ඊයේ (1) උදෑසන නිව්ජර්සි ජනපදයේ සංචාරයක යෙදුණේය. සුළි කුණාටුවෙන් බලපෑම් එල්ල වූයේ ඇමෙරිකාවේ නැගෙනහිර වෙරළ තීරයේ ප‍්‍රාන්තවලටය. ඒ අතරින් නිව්යෝර්ක් සහ නිව්ජර්සි යන ජනපද ඉතා දරුණු ලෙස බැට කෑවේය. ජනපති ඔබාමා නිව්ජර්සි ප‍්‍රාන්තයේ සංචාරය කරමින් සිදුවූ හානිය නිරීක්ෂණය කළ අතර, විපතට පත් වූවන් හමුවී ඔවුන්ගේ සැප දුක් විමසා බැලීමට ද අමතක නොකළේය. විපතට පත් වූවන් අමතමින් ඔබාමා කියා සිටියේ ‘ඔබ වෙනුවෙන් අප ඉන්නවා. අප ඔබ තනි කරන්නේ නැහැ’ කියාය. එම සංචාරයට ඔබාමා සමඟ නිව්ජර්සි ප‍්‍රාන්ත ආණ්ඩුකාර කි‍්‍රස් කි‍්‍රස්ටී ද එක් ව සිටියේය. ඇමෙරිකානු ජනාධිපතිවරණය පැවැත්වීමට නියමිතව ඇත්තේ ලබන 6 වැනිදාය. ඩිමොක‍්‍රටික් පක්ෂ අපේක්ෂකයා ලෙස ඔබාමා ඊට ඉදිරිපත් වෙයි. ඉකුත් 30 වැනිදා ‘සැන්ඩි’ සුළි කුණාටුව නිව්යෝක් නුවරට කඩා වැදීමත් සමඟ මැතිවරණ කටයුතු වහා නවතා දැම්මේය. එම අවස්ථාවේ ඔහු සිිටියේ ෆ්ලොරීඩා ප‍්‍රාන්තයේය. සහන සේවා කටයුතු අධීක්ෂණය කිරීමට ඔබාමා වහා වොෂින්ටන් අගනුවරට පැමිණියේය. ජනපතිවරණයට ඉදිරිපත් වන ඔබාමාගේ ප‍්‍රතිවාදියා වන රිපබ්ලිකන් අපේක්ෂක මිට් රොම්නි ද සිය ජනාධිපතිවරණ ප‍්‍රචාරක කටයුතු අත්හිටුවා ඇති අතර මේ වනවිට ඔහු සුළි කුණාටුවෙන් විපතට පත් වූවන්ට සහනාධාර බෙදා දීමේ කටයුතුවල නියැළී සිටී. නිව්ජර්සි ජනපදයේ පීඩාවට පත් ජනතාව හමුවීමට පෙර ඔබාමා, නිව්ජර්සි ජනපදයේ ආපදා කළමණාකාර දෙපාර්තමේන්තුවට ගොස් එහි ප‍්‍රධානීන් හමුවී සහන සේවා සිදුවන අයුරු විමසා සිටියේය. ඇතැම් දේශපාලන විචාරකයන් පවසන්නේ ලබන 6 වැනිදා පැවැත්වෙන ජනපතිවරණයේ ජයග‍්‍රහණය තීරණය කිරීමට ‘සැන්ඩි’ සුළි කුණාටුව සමත් වනු ඇතැයි කියාය. මැතිවරණ කටයුතු නවතා දැමූ බව කීවත් ඔබාමා සහ ප‍්‍රතිවාදී අපේක්ෂක රොම්නි ඡන්ද වාසි ලබා ගැනීමේ අරමුණින් විපතට පත්වූවන්ගේ සහන සේවා කටයුතුවල නියැලී සිටින බව දේශපාලන විචාරකයෝ පෙන්වා දෙති. නිව්ජර්සි ආණ්ඩුකාර කි‍්‍රස් කි‍්‍රස්ටී (වමේ) සහ ඔබාමා (දකුණේ) නිව්ජර්සි ජනපදයේ බි‍්‍රගැන්ටීන් නුවර විපතට පත්වූවන් හමුවෙමින් ... ප‍්‍රතිවාදී අපේක්ෂක මිට් රොම්නි විපතට පත්වූවන්ට  පානීය ජලය බෙදා දීමට සැරසෙමින් ... සැඬ රළ පහරට හසුවූ බෝට්ටු