නයිජීරියාවේ ලාගෝස් හි දේවස්ථානයක් කඩාවැටී 44ට වැඩි පිරිසක් මියයන්නට ඇතැයි විදෙස් මාධ්‍ය වාර්තාකරයි. කඩාවැටුණු සුන්බුන්වලට යටවී සිටි 130ක් පමණ බේරාගත් බවත් එරට හදිසි අවස්ථා කළමනාකරණ මධ්‍යස්ථානය පවසයි. ටී.බී.ජෝශුවා නමැති ප්‍රසිද්ධ නයිජීරියානු දේශකවරයෙක් මේ දේවස්ථානය පවත්වාගෙන යයි. දේවස්ථානයට තවත් තට්ටු තුනක් එකතුකිරීමේ ඉදිකිරීම් සිදුවෙමින් තිබිය දී මෙලෙස කඩා වැටී ඇත.

සිද්ධිය වාර්තාකිරීමට ගිය මාධ්‍යවේදීන්ටත් සහන සේවකයන්ටත් දේවස්ථානයේ සාමාජිකයන්ගේ කෙණෙහිළිකම්වලට මුහුණ දීමට සිදුවූ බව ද මාධ්‍ය වාර්තාකැර ඇත. එක් වාර්තාකරුවකුගේ කැමරා උපකරණවලට ද හානි සිදුව ඇත.

ජෝශුවා පවසන්නේ දේවස්ථානයට ඉහළින් ඉතා පහතින් කිහිපවරක් කැරකුණු ගුවන් යානයක් මේ කඩා වැටීමට හේතුවවක් වූ බවයි. හදිසි අවස්ථා කළමනාකරණ මධ්‍යස්ථානය පවසන්නේ මූළික සැලැස්මට අනුකූල නොවන ලෙස තවත් තට්ටුවක් එක්කිරීම මේ කඩා වැටීමට හේතුවූ බවයි.

ජෝශුවාගේ දේශන ඇසීමට මේ පල්ලියට දහස් ගණනින් අනුගාමිකයෝ පැමිණෙති.