නැගෙනහිර රුසියාවට ඔබ්බෙන් පිහිටි ඔහොට්ස්ක් මුහුද ඊයේ(14) රික්ටර් පරිමාණයේ ඒකක 7.7ක් සටහන් කළ ප‍්‍රබල භූකම්පනයකින් කැලඹී ගියේය. භූකම්පනයේ අපිකේන්ද්‍රය රුසියාවේ පොරොනේස්ක් නගරයට කිලෝමීටර් 158ක් දුරින් පිහිටි ස්ථානයක කිලෝමීටර් 625ක් භූ අභ්‍යන්තරයේ පිහිටා තිබූ බව ඇමෙරිකානු භූවිද්‍යා සමීක්ෂණ ආයතනය පවසයි. ජපාන කාලගුණවිද්‍යා දෙපාර්තමේන්තුව පැවසුවේ භූකම්පනයේ බලපෑම උතුරින් පිහිටි හොකයිඩෝ දූපතටද දැනුණු බවයි. එසේ වූවත් පැසිෆික් සුනාමි අනතුරු ඇඟවීමේ මධ්‍යස්ථානය සඳහන් කළේ මේ හේතුවෙන් විනාශකාරී සුනාමි තත්ත්වයක් ඇති නොවන බවයි. භූකම්පනයෙන් කිසිදු දේපළ හෝ ජීවිත හානියක් සිදු නොවූ බව විදෙස් වාර්තා සඳහන් කරයි.