මිනිසා විසින් භාවිතා කරන මාංශමය ආහාර ප්‍රමාණය අඩු නොකළහොත් ආහාර හිඟවීම වැළැක්විය නොහැකි වනු ඇතැයි පර්යේෂක පිරිසක් පෙන්වාදෙති.

කේම්බ්‍රිජ් හා ඇබර්ඩින් විශ්වවිද්‍යාලවල සිදුකරනලද පරීක්ෂණයකින් පසු ඔවුහු මේ බව දැක්වෙන පර්යේෂණ පත්‍රිකාව නිකුත් කැර ඇත. ඔවුන් පෙන්වාදෙන්නේ දැනට ලෝක ආහාර පුරුදු අනුව මාංශමය ආහාර පරිභෝජනය වැඩි වුවහොත් ආහාර නිෂ්පාදනය හේතුවෙන් ඇතිවන හරිතාගාර වායු ප්‍රමාණය සියයට 80කින් ඉහළ යන බවයි.

මේ හේතුවෙන් හරිතාගාර වායුව පරිසරයට මුදාහැරීම සීමා කිරීමේ බලවත් දුෂ්කරතා ඇතිවන බව ඔවුහු කියති. පර්යේෂකයන් පෙන්වා දෙන්නේ බොහෝ රටවල ඇති නගරයන්හි ඇමෙරිකානු ක්‍රමයේ මාංශමය ආහාර පරිභෝජනය සීඝ්‍රයෙන් ඉහළ ගොස් ඇති බවයි. මේ හේතුවෙන් මාංශ සහ කිරි ආහාර අනුභවය වැඩිවී ඇත.

පර්යේෂකයන් පෙන්වාදෙන්නේ මේ හේතුවෙන් දැනට වගාකටයුතු සඳහා යොදා ගන්නා ඉඩම් පශු සම්පත් සඳහා යොදා ගැනීමෙන් ලෝකයේ ගොවීන් වෙනත් ආහාරවල අවශ්‍යතාව සපුරාලීමට අපොහොසත් වන බවයි. මේ පර්යේෂණයේ ප්‍රධානී බොජනා බසේල්ජ් පවසන්නේ කෘෂිකාර්මික ක්‍රමවල වරදක් නොමැති වුවත් අපේ ගන්නා ආහාරවල තේරීම මගින් මේ තත්ත්වය ඇතිවන බවයි.

කැලෑ ප්‍රමාණය සීඝ්‍රෙයන් අඩුවීම හේතුවෙන් කාබන්ඩයොක්සයිඩ් ප්‍රතිශතය ඉහළයන අතරම පශු සම්පත් වර්ධනය වීමෙන් මීතේන් මට්ටම ඉහළ යාම සිදුවේයැයි පර්යේෂකයෝ කියති. ඔවුන් පෙන්වා දෙන තවත් කරුණක් වන්නේ පොහොර භාවිතය දේශගුණික විපර්යාසයට හේතුවන බවයි.