ජීවිතාන්ත සිර දඬුවම් විඳින ඊජිප්තුවේ හිටපු ජනපති හොස්නි මුබාරක්ගේ අසනීප තත්ත්වය සැලකිල්ලට ගෙන ඔහු බන්ධනාගාරයෙන් රෝහලකට මාරු කරන්නැයි ඉල්ලමින් මුබාරක් හිතවාදීහු පිරිසක් පෙරේදා (10) කයිරෝ අගනුවර විරෝධතා රැලියක් පැවැත් වූහ. පිළිකාවකින් පීඩා විඳින 84 හැවිරිදි හිටපු ජනපති මුබාරක්, මේ වනවිට බන්ධනාගාර සිර මැදිරියක ජීවත් වන්නේ දිවි සුරකින යන්ත‍්‍රයකට සම්බන්ධ කර සිටීමෙනි. ඔහු බන්ධනාගාරයෙන් රෝහලකට මාරු කළ යුතු යැයි වෛද්‍යවරුන් විසින් ද නිර්දේශ කරනු ලැබ ඇත. මුබාරක් රෝහල් ගත කරන්නැයි ඊජිප්තුවේ හමුදා පාලකයන්ට බල කරමින් පැවැත් වූ එම විරෝධතාවට, මුබාරක් හිතවාදීහු 200 කට වැඩි පිරිසක් සහභාගී වූහ. ඊජිප්තුවේ පසුගිය වසරේ මාර්තු මාසයේ රාජ්‍ය විරෝධී උද්ඝෝෂණ ආරම්භ වූ අවස්ථාවේ, ආරක්ෂක අංශ යොදවා විරෝධතාකරුවන් මර්දනය කිරීමට අණ දීමත්, ඔවුන් ඝාතනය කිරීමට කුමන්ත‍්‍රණය කිරීමත් යන චෝදනාවලට මුබාරක්ට ජීවිතාන්ත සිර දඬුවමක් නියම කෙරුණේ ඉකුත් දෙවැනිදාය. මුබාරක්ට මරණ දඬුවම ලබා දෙන්නැයි බල කරමින් ද එම අවස්ථාවේදී කයිරෝ නුවර තහ්රීර් චතුරස‍්‍රයේ මහා විරෝධතාවක් පැවැත්විණි. මුබාරක්ගෙන් පසු නව ජනපතිවරයකු තෝරා ගැනීමේ අරමුණින් ඊජිප්තුවේ පසුගියදා ජනපතිවරණයක් පැවැත්විණි. වසර ගණනකට පසු පැවැති නිදහස් ජනපතිවරණය වූයේ ද එයයි. එහි දෙවැනි වටය ලබන 16 සහ 17 වැනිදා පැවැත්වීමට නියමිතය.