මෙක්සිකෝව වෙළාගෙන ඇති දුප්පත්කම සහ ප‍්‍රචණ්ඩකි‍්‍රයා නැවැත්වීමට වහාම කි‍්‍රයා කරන බව එරට නව ජනාධිපතිවරයා ලෙස ඊයේ(2) දිවුරුම් දුන් එන්රික් පෙනා නීටෝ අවධාරණය කර කියා සිටියේය. හැත්තෑඑක් වසරක් පුරාවට මෙක්සිකෝවේ පාලන බලය හෙබ වූ ජනපති නීටෝගේ පී.ආර්.අයි පක්ෂය වාමාංශික නායක ආන්ද්‍රේස් මැනුවෙල් ලෝපේස් පරාජයට පත් කරමින් මෙවර ජනාධිපතිවරණයෙන් ජය ගැනීමට හැකි විය. මෙක්සිකෝවේ නව නායකයා ලෙස නීටෝ බලයට පත් වූයේ හිටපු ජනපති පිලිප් කැල්දෙරන්ගෙන් පසුවය. මිලියන එකසියදහයකට ආසන්න ජනතාවක් වෙසෙන මෙක්සිකෝවේ ආර්ථික නංවාලීම සඳහා නව ජනපති නීටෝ කරුණු 13කින් යුත් ආර්ථික සැලසුමක් ඉදිරිපත් කර තිබේ. එමඟින් රටේ පවත්නා දිළිඳුකම, කුසගින්න සහ වර්ධනය වෙමින් පවතින අපරාධ රැුල්ල මැඬලීම අපේක්ෂා කෙරේ. ‘‘මගේ රජයේ පළමු කාර්යය රටට සාමය උදා කිරීමයි. රටේ ජනතාවට සිය ගම්බිම් සහ නගරවල සැකෙන් බියෙන් තොරව නිදහසේ සැරිසැරීමට අවශ්‍ය පසුබිම සලසනවා.’’ යැයි ජනපති නීටෝ සිය ධූරයේ දිවුරුම් දෙමින් වැඩිදුරටත් සඳහන් කළේය. දකුණු ඇමෙරිකාවේ දෙවැනි විශාලතම ආර්ථිකයට හිමිකම් කියන රට ලෙස හැඳින්වෙන මෙක්සිකෝවේ විශාල වශයෙන් මත්ද්‍රව්‍ය ජාවාරම සිදු කෙරේ. පසුගිය වසර හයක කාලය තුළ මත්ද්‍රව්‍ය ජාවාරම් සහ වීදි ගැටුම් හේතුවෙන් මියගිය ගණන හැටදහස ඉක්මවයි.