ඉතාලියේ මධ්‍යධරණී මුහුදේ පිහිටි ගිග්ලියෝ දූපත අසල කොරල් පරයක හැපී කොන්කෝඩියා නමැති සුඛෝපභෝගී නැව පෙරැළුණු අවස්ථාවේදී තමා නැව අතැර පලාගියබවට නගන චෝදනා ප‍්‍රතික්ෂේප කරන බව අනියම් මිනීමැරුම් චෝදනාවලට ලක්ව සිටින එම නැවේ කපිතාන්වරයා පෙරේදා(17) කියා සිටියේය. කපිතාන්වරයා ඒ බැව් ප‍්‍රකාශ කළ අවස්ථාව වන විට නාවික අනතුරින් මිය ගිය තවත් පුද්ගලයන් පස් දෙනකුගේ මළ සිරුරු ගොඩ ගැනීමට හැකි වූ බවත් ඒ සමගම අනතුරින් මිය ගිය ගණන 11 දක්වා ඉහළ ගොස් ඇති බවත් සහන සේවා කණ්ඩායම් කියා සිටියේය. නැව අනතුරට ලක්වීමෙන් අනතුරුව එහි කපිතාන්වරයා වූ ෆ‍්‍රැන්සෙස්කෝ ෂෙටීනෝ (52) සමග සිදු කළ දුරකථන සංවාදයක් ඉතාලි වරාය අධිකාරිය විසින් පටිගත කර ඇති අතර එම සංවාදයට අනුව නැව අනතුරට පත් වූ අවස්ථාවේදී වෙරළාරක්ෂක අංශ මගින් නැවෙන් පිටවීමට උත්සාහ ගත්  කපිතාන්වරයාට අනතුරට පත් නැව වෙත ආපසු යන ලෙස දන්වා ඇති අතර ඔහු එම නියෝග නොසලකා හැර ඇත. නැව අනතුරට ලක්වීම සම්බන්ධයෙන් නීතිවේදීන් විසින් දීර්ඝ ලෙස ප‍්‍රශ්න කර ඇති අතර එහිදී, නැව කොරල් පරයේ ගැටුණු අවස්ථාව වන විට තමා සුක්කානම් මැදිරියේ සිටි අතර පසුව නැව ඇලවීමත් සමග තමන් මුහුදට වැටුණු නිසා තමාට නැවට ගොඩවීමට නොහැකි වූ බව කපිතාන්වරයා පැවසූ බව මාධ්‍ය වාර්තා සඳහන් කරයි. දිවි ගැලවීමේ මෙහෙයුම්වල නිරත සහන සේවා කණ්ඩායම් පවසන්නේ තවමත් පුද්ගලයන් 24 දෙනකු අතුරුදන්ව ඇති බවය. අයහපත් කාලගුණික තත්වයක් පැවතිය ද අතුරුදහන් වුවන් සෙවීමේ මෙහෙයුම් අඛණ්ඩව සිදු කරන බව සහන සේවකයෝ පවසති. කොන්කෝඩියා නැව අනතුරට පත්වීමේදී දිවි ගලවාගත් අය අතර 1912 ටයිටැනික් නෞකාවේ අනතුරින් දිවිගලවාගත් අයෙකුගේ මිණිබිරියක සිටින බව ද වාර්තා වේ. කොන්කෝඩියා නැවේ කපිතාන් ෆ‍්‍රැන්සෙස්කෝ ෂෙටීනෝ