පෙම්වතුන්ව සිටි කාලයේ තමන්ට දැරීමට සිදුවූ වියදම් හිටපු පෙම්වතියගෙන් ලබා ගැනීමට සැරසෙන අපූරු පෙම්වතෙකු ගැන ඕස්ට්‍රේලියාවෙන් වාර්තා වේ.

පෙම්වතා නමින් බෘෘස් ඩස්ටින්ග්ය. ඔහු හැට පස් හැවිරිදිය. පෙම්වතිය මේරි ලැකොම්බේය.ඇය හතළිස් දෙහැවිරිදිය.

වාර්තා වන අන්දමට මේරි බෘස් යටතේ සේවය කර ඇත්තීය.මේරි පිළිබඳව බෘස්ට ආදර සිතුවිලි පහළ වී ඇත්තේ මේ අවදියේය.

තමන් හා එක් වීමට මේරි කිසිදු අකමැත්තක් නොදැක්වූ බව බෘස් කියයි.මේ නිසාවෙන් තමන් ඇයගේ අවශ්‍යතා වෙනුවෙන් අත දිගහැර වියදම් කළ බවත් අවසානයේ විවාහ වීමට කැමැත්ත විමසූ විට ඇය තමන්  ප්‍රතික්ෂේප කළ බවත් ඔහු පවසයි.

බෘස් දැනටමත් ‘ප්‍රේම‘ කළ කාලයේ වියදම් ඇතුළත් බිල්පතක් මේරි වෙත යවා තිබේ.එයට අනුව බෘස් මේරි වෙනුවෙන් දරා ඇති මුදල පවුම් ලක්ෂයකට  (රුපියල් 21300000) ආසන්නය.

අරකට මේකට මුදල් වුවමනා යැයි කියමින් ඇය තමන්ගෙන් මුදල් ලබා ගත් බවද වරක් ප්ලාස්ටික් සැත්කමක් කර ගැනීම සදහාත් තමන්ට බොරු ගොතා මුදල් ලබාගත් බවද බෘස් කියයි.

නමුත් මේරි මේ චෝදනා සියල්ලක්ම ප්‍රතික්ෂේප කරයි.තමන් හා බෘස් අතර පැවතියේ මිතුරු සබදතාවක් පමණක් බවත් එමෙන්ම තමන් ඔහු පවසන ආකාරයට මුදල් ඉල්ලා නැති බවත් ඇය කියයි. බෘස් හිතවත්කම ප්‍රේමයකැයි වරදවා වටහාගත්තාට තමන්ට කරන්නට දෙයක් නැතැයි ඇය පවසයි.

නමුත් බෘස් මෙය ලේසියෙන් අත්හරින්නට යන බවක් නම් පෙනෙන්නට නැත.කෙසේ හෝ වියදම් වූ මුදල මේරිගෙන් ලබාගන්නෙමැයි අදිටනින් හේ සිටී.