වයඹදිග පාකිස්තානයේ පෙෂාවෝර් නගරයට නුදුරින් පිහිටි බස් නැවැතුම්පොළකට ඊයේ (23) දහවල් එල්ල වූ මරාගෙන මැරෙන බෝම්බ ප‍්‍රහාරයකින් පුද්ගලයන් 12 දෙනකු ජීවිතක්ෂයට පත්වූ අතර 35 දෙනෙක් තුවාල ලැබූහ. බෝම්බය පුපුරා ගියේ කොහාට් නගරයේ බස් නැවැතුම්පොළේය. එම අවස්ථාවේදී බස් නැවැතුම මගීන්ගෙන් පිරී තිබුණු බව ආරක්ෂක අංශ පවසයි. බෝම්බකරුගේ ඉලක්කය වී ඇත්තේ බස් නැවැතුම්පොළෙට පැමිණි පාකිස්තාන හමුදා සොල්දාදුවන් පිරිසක් යැයි පොලිසිය පවසයි. තුවාල ලැබූවන් කිහිප දෙනකුගේ තත්ත්වය බරපතළ බවත් මියගිය ගණන තවත් ඉහළ යා හැකි බවත් රෝහල් ආරංචි මාර්ග පෙන්වා දෙයි. ප‍්‍රහාරයේ වගකීම තවමත් කිසිවකු විසින් භාර ගනු ලැබ නැති අතර ආරක්ෂක අංශ පවසන්නේ එය තලේබාන් සටන්කාමීන්ගේ ප‍්‍රහාරයක් විය හැකි බවය. මේ අතර වයඹ දිග පාකිස්තානයේ ගෝත‍්‍ර ප‍්‍රදේශවල සැඟවී තලේබාන් සටන්කාමීන් ඉලක්ක කර ගනිමින් පාකිස්තාන හමුදාව ඊයේ උදෑසන එල්ල කළ ගුවන් ප‍්‍රහාරයකින් සටන්කාමීහු 15 දෙනෙක් ජීවිතක්ෂයට පත්වූහ. ප‍්‍රහාර එල්ල කළේ උතුරු උරාකායි පළාතේ, කදිසායි, සමර්බසාර් සහ බර්මේලා යන ප‍්‍රදේශවල පිහිටි තලේබාන් තිප්පොළ හතරකට බවත් ප‍්‍රහාරයට ප‍්‍රහාරක ජෙට් යානා දෙකක් යොදා ගත් බවත් පාකිස්තාන හමුදාව වැඩි දුරටත් කියා සිටියි. උතුරු උරාකායි ප‍්‍රදේශය පාකිස්තානයේ කි‍්‍රයාත්මක තරීක් ඊ තලේබාන් සටන්කාමීන්ගේ සැඟවුම් ස්ථානයක් ලෙස ප‍්‍රකට බව ද පාකිස්තාන හමුදාව පවසයි. පාකිස්තාන හමුදාව සහ තලේබාන් සටන්කාමීන් අතර යුද ගැටුම් බහුලව පවතින්නේ ද උතුරු උරාකායි ප‍්‍රදේශයේය. ප‍්‍රහාරය එල්ල කළේ පාකිස්තාන බුද්ධි අංශ තොරතුරු පාදක කර ගනිමින් යැයි ද පාකිස්තාන ගුවන් හමුදාව වැඩිදුරටත් කියා සිටියි.