ඇමෙරිකානු ජනාධිපති ඩොනල්ඞ් ට්‍රම්ප් ෆ්ලෝරිඩාවේ ඊයේ (18) පැවැති මැතිවරණ රැලියකින් 2020 ජනාධිපතිවරණ සටන සඳහා සිය මැතිවරණ ප්‍රචාරණ ව්‍යාපාරය ආරම්භ කළේය.

දැඩි ඝෝෂාකාරී ස්වභාවයක් ගත් මෙම රැළිය ජාතිකවාදී ස්වරූපයක් ගත් බව විදෙස් මාධ්‍ය වාර්තා කර තිබිණි. නීතිවිරෝධී සංක්‍රමණිකයන්ගෙන් රටට දැඩි තර්ජනයක් ඇති බව ඇමෙරිකානු ජනාධිපතිවරයා මෙම මැතිවරණ රැලියේදී පෙන්වා දුන් අතර කර්මාන්තවල සේවයේ නිරත සාමාන්‍ය ඇමෙරිකානු වැසියන් සටන් වදින බව ද අවධාරණයෙන් කීය.

සිය ප්‍රතිවාදී ඩිමොක්‍රටික් පක්ෂයේ සාමාජිකයන් දැඩි ලෙස විවේචනය කළ ඇමෙරිකානු ජනාධිපතිවරයා ඔවුන් රට විනාශ කිරීමට සැරසෙන රැඩිකල් වාමාංශිකයන් පිරිසක් බවත් ඔවුන් වෛරයෙන් පිරී ඇති බවටත් චෝදනා කළේය. ජනාධිපතිවරණයේදී භූ කම්පනයක් සිදුවනු ඇතැයි ද හෙතෙම කීවේය.

“අපි එක පාරක එය කළා. නැවත වරක් එය කරනවා” යැයි ඇමෙරිකානු ජනාධිපතිවරයා මෙම රැලියේදී පොරොන්දු වූයේය. ෆ්ලෝරීඩා ප්‍රාන්තයේ ඕර්ලන්ඩෝ හි පැවැති එම මැතිවරණ රැලියට ට්‍රම්ප්ගේ ආධාරකරුවන් 20,000කට වැඩි පිරිසක් සහභාගී වී සිටියේය.

“ඇමෙරිකා එක්සත් ජනපදයේ ජනාධිපතිවරයා ලෙස දෙවැනි වරටත් ධුරයට තේරී පත්වීම සඳහා මම අද මැතිවරණ ප්‍රචාරණ රැලිය නිල වශයෙන් ආරම්භ කරනවා” යැයි ඇමෙරිකානු ජනාධිපතිවරයා පැවැසීය.

(ඒ.එෆ්.පී. ඇසුරිනි)

(055)