ඊජිප්තු ජනපති මොහොමඞ් මොර්සිට විරෝධය පළ කරන පිරිස් සහ ඔහුගේ ආධාරකරුවන් අතර ඊයේ (6) එරට කයිරෝ අගනුවර දරුණු ගැටුම් හටගත්තේය. ගැටුම්වලින් පස් දෙනකු ජීවිතක්ෂයට පත්වූ අතර 350 දෙනකු තුවාල ලැබූ බව විදෙස් පුවත් සේවා වාර්තා කරයි. කලහකාරීව හැසිරුණු පිරිස් විසුරුවා හැරීමට පොලිසිය යෙදවීමට ඊජිප්තු රජය කටයුතු කර තිබුණ ද විරෝධතාකරුවෝ පොලිස් නිලධාරීන්ට ද පහර දුන්හ. ජනපති මොර්සිට එරෙහි විරෝධතා ආරම්භ වූයේ ඊජිප්තුවේ නව ව්‍යවස්ථාව සම්බන්ධයෙන් ජනමත විචාරණයක් පැවැත්වැත්වීමට නියමිතව තිබියදීය. විරෝධය දක්වන විපක්ෂ දේශපාලන කි‍්‍රයාකාරීන් සහ ඔවුන්ගේ ආධාරකරුවන් චෝදනා කරන්නේ ජනපති මොර්සි අසීමිත ලෙස බලතල පවරා ගැනීමට උත්සහ ගන්නා බවය. ජනපති මොර්සි ගත් කි‍්‍රයාමාර්ගවලට විරෝධය පළ කරමින් දහස් ගණන් විපක්ෂ කි‍්‍රයාකාරීන් ඉකුත් සතියේ සිට එරට කයිරෝ අගනුවරට රැුස්ව සිටි අතර එම පිරිස් සහ මොර්සිගේ මුස්ලිම් සහෝදරත්වය පක්ෂයේ ආධාරකරුවන් අතර ගැටුම් ආරම්භ වූයේ පෙරේදා (5) සිටය. හටගෙන ඇති අර්බුදය හේතුවෙන් ජනපති මොර්සිගේ උපදේශකවරුන් තිදෙනකු ද ඉල්ලා අස්වී ඇතැයි වාර්තා වේ. විරෝධතාකරුවන් ජනපති මන්දිරය ද වටලා ඇති අතර එම පිරිස් විසරුවා හැරීමට හමුදාව යුද ටැංකි යොදවා ඇතැයි ද වාර්තා වේ. කලහකාරීන් ජනපති මන්දිරය වටලද්දී ජනපති මොර්සි ආරක්ෂිතව ඉන් පිටතට ගෙන යෑමට ආරක්ෂක අංශ සමත් වූ බවද වාර්තා විය. මේ අතර ජනපති ලෙස මොර්සි බලතල පවරා ගැනීමට විරෝධය පළ කරමින් එරට නීතීඥවරුද පසුගිය සතියේ වැඩවර්ජනයක ද නිරත වූහ. විනිසුරුවරුන් එක හඬින් කියා සිටින්න වූයේ ජනපති මොර්සිගේ නව රජය බලයෙන් ඉවත් විය යුතුයි කියාය. ඉකුත් වසරේදී දිගු කලක් ඊජිප්තුව පාලනය කළ ජනපති හොස්නි මුබාරක්ගේ පාලනය පෙරළා දැමීමට කටයුතු කළේ වත්මන් ජනපති මොර්සිගේ මුස්ලිම් සහෝදරත්ව පක්ෂයයි.