සිරියාවේ හූලා නගරයට එල්ල වූ ප‍්‍රහාරයේ වගකීම බාර නොගන්නා බව එරට ජනපති බෂීර් අල් අසාද්ගේ රජය ප‍්‍රකාශ කිරීම ජාත්‍යන්තරයේ දැඩි දෝෂ දර්ශනයට ලක් වූ අතර සිරියාවට එරෙහිව යෝජනාවලියක් සම්මත කර ගැනීමේ අරමුණින් එක්සත් ජාතීන්ගේ ආරක්ෂක මණ්ඩලය ඊයේ (28) විශේෂ හමුවක් පැවැත්වීය. පසුගිය සෙනසුරාදා (26) වැනිදා හූලා නගරයට එල්ල වූ ෂෙල් වෙඩි ප‍්‍රහාරවලින් සහ වෙඩි තැබීම්වලින් 108 දෙනකු මියගොස්, 300 දෙනෙක් තුවාල ලැබූහ. ප‍්‍රහාරය ගැන වාර්තා වූ සැණින් සිරියාවට පැමිණ සිටින එක්සත් ජාතීන්ගේ සාම නිරීක්ෂණ කණ්ඩායම හූලා නගරයට ගිය අතර නිරීක්ෂණ කණ්ඩායමේ නායක මේජර් ජනරාල් රොබට් මූඞ් කියා සිටියේ තමන්ට මහා සමූල ඝාතනයක් දකින්න ලැබුණු බවය. මියගිය පිරිස අතර කුඩා දරුවන් 40 කට වැඩි පිරිසක් සිටින බව ද ජනරාල් මූඞ් පැවැසීය. මරණ බොහොමයක් සිදුවී ඇත්තේ ෂෙල් වෙඩි ප‍්‍රහාර හේතුවෙන් බවත් සෙසු පිරිස වෙඩි ප‍්‍රහාරවලට ලක් ව ඇති බවත් ජනරාල් මූඞ් කීයේය. ජනතා විරෝධතා හමුවේ බලයෙන් ඉවත් වීම ප‍්‍රතික්ෂේප කරන ජනපති අසාද්ගේ රජය ප‍්‍රකාශ කළේ හූලා නගරයට පහර දුන්නෝ කැරැලිකරුවන් සමඟ එක් වී සිටින අල් කයිඩා සටන්කාමීහු බවය.