ලොව අංක එකේ කුඩු රජකු වන මෙක්සිකෝ ජාතික ජොඅක්වින් ගුස්මන් හෙවත් ‘‘එල් චැපෝ‘‘ අත්අඩංගුවට ගැනීමට හැකිවූ බව ඇමරිකා ආරක්ෂක අංශ කියති.

එල් චැපෝ මෙක්සිකෝවේ කි‍්‍රයාත්මක ප‍්‍රධානතම මත්කුඩු ජාවාරම් කල්ලිය වන ‘‘සිනලෝආ‘‘ හි නායකයා වන බව සදහන් වෙයි.සිනලෝආ කල්ලිය මේ දක්වා සිදුකර ඇති අපරාධ ප‍්‍රමාණය නොගිනිය හැකි තරම් යැයි ආරක්ෂක අංශ බළධාරීහු පවසති.

එල් චැපෝ 2001 වසරේදී අත්අඩංගුවට ගැනීමට මෙක්සිකෝ ආරක්ෂක අංශ සමත්වූවත් ඔවුන්ගේ ඇසට වැලි ගසා පැන ගැනීමට හේ සමත් විය.එදවස පටන් ඔහු විවිධ ආරූඪ නම් භාවිතා කරමින් නොයෙක් රටවල ජීවත්ව ඇතැයි පැවසේ.

මෙවර ඔහු අත්අඩංගුවට ගෙන තිබෙන්නේ මෙක්සිකෝවේ මෙහෙයුම්හි නිරත වන ඇමරිකා ආරක්ෂක අංශ බලධරයින්ට ලැබුණු ඔත්තුවකිනි.ඒ අනුව මෙක්සිකෝවේ හෝටලයක නැවතී සිටි එල් චැපෝව අත්අඩංගුවට ගෙන ඇත.

එල් චැපෝ සතුවන සම්පත් වල වටිනාකම ඩොලර් සිය කෝටිය ඉක්මවන බව සදහන්ය.ඔහු සතු මුදල් බලය නිසාම ෆොර්බ්ස් සගරාව වරක් එල් චැපෝ ප‍්‍රංශ හා වෙනිසියුලා ජනපතිවරුන්ටත් වඩා බලවත් පුද්ගලයෙක් ලෙස හදුන්වාදුන්නේය.

ජොඅක්වින් ගුස්මන් මෙක්සිකෝවේ ‘‘ඔසාමා බිල් ලාඩින්‘‘ ලෙසද හැදින්වුනි.ඒ ඔහුගේ ක‍්‍රෑර කමත් ඒ හා බැදුණු ඔහු සතුවන බලයත් නිසාමය.

සිනලෝආ කල්ලියේ ආධාරකරුවන් මුළු ලොව පුරාම විසිර සිටින්නේයැයි බලධාරීහු කියති.මෙනිසාවෙන්ම ඔවුනට ලොව පුරා විහිදුනු ජාවාරම් මාර්ගයන් ඇති බවත් එවා මාර්ගයෙන් ලොව පුරා මත්ද්‍රව්‍ය බෙදාහරින බවත් ඔවුහු පවසති.

පසුගිය වසරේ මෙක්සිකෝ ආරක්ෂක අංශ මෙතෙක් වාර්තා වූ විශාලතම කංසා තොගය සොයාගත් අතර එය ටොන් 134 ක බරින් යුතු විය.එය සිනලෝආ කල්ලිය සතුවූවකි.

සිනලෝආ කල්ලිය තරම් සංවිධානාත්මක,දියුණු තාක්ෂණික ක‍්‍රම භාවිතා කරන මත්කුඩු ජාවාරම්කරුවන් ලොව නොමැත යැයි බළධාරීහු පවසති.මෙනිසා එහි නායක එල් චැපෝ අත්අඩංගුවට ගැනීමට හැකිවීම විශාල ජයග‍්‍රහණයක් ලෙස ඔවුහු දකිති.

නමුත් සිනලෝආ කල්ලිය ප‍්‍රකාශයක් නිකුත් කරමින් දන්වා ඇත්තේ එල් චැපෝගෙන් හිස්වූ නායක පුටුවට මේ වන විටත් තවත් කෙනකු පත් කර තිබෙන බවයි.තම නායකයින්ට ආරක්ෂක අංශ වලින් එල්ල වන තර්ජනයන් නිසා තමන් සෑම විටම සිටිනුයේ සූදානම් ශරීරයෙන් බවත් නායකයෙකුට විපතක් සිදුවුවහොත් ඔහුගේ තැන ගැනීමට තවත් කෙනෙක් මුල සිටම සූදානම් කර තිබෙන බවත් එම ප‍්‍රකාශයේ සදහන්ය.