නැගෙනහිර චීනයේ පෙර පාසලක් තුළ සිදු වූ පිපිරීමකින් හත්දෙනකු මියගොස් 60කට ආසන්න පිරිසක් තුවාල ලැබූහ. පිපිරීමෙන් දරුවන් කිසිවකුටත් හානියක් සිදුව නැතැයි ද එරට මාධ්‍ය වාර්තා කළේය. 
 
පිපිරීම සිදුව ඇත්තේ එරට වේලාවෙන් අද (15) පස්වරු 5ට පමණය. මාපියන් දරුවන් පෙර පාසලෙන් ගන්නා අවස්ථාවේදී පිපිරීම සිදුව තිබේ. පිපිරීමෙන් එම ස්ථානයේදීම දෙදෙනකු මියගිය අතර ඉතිරි පස් දෙනා මියගොස් ඇත්තේ ඉන්පසුවය. තුවාල ලැබූවන්ගෙන් 9 දෙනකුගේ තත්ත්වය බරපතළ යැයි ද වාර්තා විය.
 
පිපිරීමට හේතුව අද (15) රාත්‍රීය වනතුරුත් අනාවරණය වී නොතිබූ අතර ගෑස් නාලයක පිපිරීමක් ඊට හේතු වන්නට ඇතැයි වාර්තා විණි.  
 
චීනයෙන් පිපිරීම් සහ අනතුරු පිළිබඳ පුවත් නිරන්තරයෙන් වාර්තා වේ. නීතිරීතවල තිබෙන අඩුපාඩුත් මෙවැනි සිදුවීම් සම්බන්ධයෙන් අඩු අවධානයත් ඊට හේතු වී තිබේ. කෙසේ නමුත් ඉදිරියේදී ගොඩනැගිලි ආදී සියල්ල නියාමනය කරමින් අඩුපාඩු සැකසීමට කටයුතු කරන බව චීන ආණ්ඩුව පොරොන්දු වී තිබේ. 
 
රොයිටර් ඇසුරිනි 055