සෞදි මාධ්‍යවේදී ජමාල් කෂෝග්ජිගේ ඝාතනය සම්බන්ධයෙන් පුද්ගලයන් පස්දෙනෙකුට සෞදි අරාබිය මරණ දඬුවම නියම කර ඇතැයි රජයේ ප්‍රකාශකයෙක් අද(23) පැවසීය.
 
අද පැවති මාධ්‍ය සාකච්ඡාවකදී ඔහු මේ බව සඳහන් කළේය.
 
වොෂින්ටන් පෝස්ට් පුවත්පතේ තීරු ලිපි රචකයකු වූ ජමාල් කෂෝග්ජි, සෞදි අරාබියේ ඔටුන්න හිමි  මුහම්මද් බින් සල්මාන් කුමරු සම්බන්ධයෙන් දැඩි විවේචනාත්මක අදහස් දැරුවේය.
 
2018 ඔක්තෝම්බර් 2 වන දිනයේ ඉස්තාන්බුල්හි පිහිටි සෞදි තානාපති කාර්යාලයේදී, කෂෝග්ජි ඝාතනය කෙරිණි. සෞදි රජයේ ඉහළ ම තනතුරු හා සම්බන්ධතා පවත්වන පිරිසක් විසින් මෙම ඝාතනය කරන ලදැයි පැවසේ.
 
සෞදි රාජකීය අධිකරණයේ ජ්‍යෙෂ්ඨ උපදේශක  සවුල් අල් කටානි සම්බන්ධයෙන්ද මෙම ඝාතනයට අදාළ පරීක්ෂණ ක්‍රියාත්මක වූ නමුත් ඔහුට එරෙහිව කිසිදු සාක්ෂියක් හමු නොවූ බවද, සාක්ෂි ප්‍රමාණවත් නොවීම හේතුවෙන් විත්තිකරුවන් 10 දෙනෙකු මුදාහැරිය බවද ඔහු වැඩිදුරටත් පැවසීය.
 
(සී එන් එන් ඇසුරිනි)

16844