අතිශය රහසිගත මෙහෙයුමක යෙදුණේ යැයි පැවසෙන වස්තු සොයන යානයක් පසුගියදා ඇමරිකාවේ කැලිෆෝර්නියා ප්‍රාන්තයේ දකුණු වෙරළබඩ පිහිටි ගුවන් පථයකට ගොඩබැස්සේය.

එක්ස් - 37 බී ලෙස හැදින්වෙන මෙම යානය නියමුවන් රහිතව පාලනය වන බව සඳහන් වේ.පසුගිය 2012 වසරේ දෙසැම්බර් මස සිට ගුවනේ අවුරුදු 2 කට ආසන්න කාලයක් ගත කළ එය එතරම් කාලයක් ගුවනේ සිටිමින් කළේ කුමක්දැයි යන්න අභිරහසකි.

දැනට අනාවරණය වී ඇති තොරතුරු වලට අනුව මෙම ව්‍යාපෘතිය ඇමරිකා ආරක්ෂක අංශ, නාසා ආයතනය හා බෝයිං ගුවන්යානා නිෂ්පාදක සමාගම එක්ව දියත් කෙරෙන්නකි. යානයේ නිශ්පාදන කටයුතු හා එය ගුවන්ගත කිරීමේ හා ගොඩ බැස්වීමේ කටයුතු ගැන කෙටියෙන් කර ඇති සදහනක් හැරෙන්නට බළධාරීන් යානයේ සැබෑ අරමුණ ගැන මේ දක්වාම කිසිත් හෙළි කර නැත.

ඇතැමුන් පවසන්නේ මෙම යානය ගුවනේ සිටි කාලය පුරාවට ඔත්තු බැලීමේ නිරතව සිටින්නට ඇති බවයි. එය විවිධ සන්නිවේදන උපකරණයන්ගෙන්ද සන්නද්ධ බව ඔවුන්ගේ අදහසයි.

තවත් අය මෙය වෙනත් රටවලට අයත් චන්ද්‍රිකා ඇමරිකාව යටතට ගැනීමට නිපදවූවක් බව කියයි.

මෙවන් යානයක් 2010 වසරේද ගුවන් ගත කෙරුණු අතර එම වසරේම දෙසැම්බර් මාසයේදී එය නැවත ගොඩබැස්සේය. එවරද යානය ගුවනේ සිට කළේ මොනවාදැයි කිසිදු කරුණක් හෙළිවූයේ නැත.

අභ්‍යාවකාශ ෂටලයකට වඩා කුඩා වන යානයේ මිනිසුන්ට ගමන් කිරීමට ඉඩ නොමැති අතර පසුපස කොටසේ නම් චන්ද්‍රිකාවක් රැදවීමට තරම් ඉඩකඩ තිබේ.පෘථීවියෙන් සැතපුම් 110 - 500 අතර දුර ගුවනේ සිටිමින් යානය පෘථීවිය වටා ගමන් කරයි.

යානය සාර්ථකව ගොඩබැස්වීම ගැන ප්‍රශංසා මුඛයෙන් අදහස් පළකර තිබූ ඇමරිකා ආරක්ෂක බළධාරීහු ඊට වැඩි යමක් ප්‍රකාශ කිරීමෙන් වැළකී ඇත.