සිරියා ජනාධිපති බෂීර් අල් අසාද්ගේ රජය, රසායනික අවි යොදා ගනිමින් කැරැලිකරුවන්ට පහරදීමක් කළහොත්, හමුදාව යවා සිරියාවට පහර දෙන බවට ඇමෙරිකානු ජනාධිපති බැරැක් ඔබාමා අනතුරු අඟවයි. ඇමෙරිකා ජනපතිවරයා මේ බව කියා සිටියේ ඊයේ (21) ධවල මන්දිරයේදී පැවැති මාධ්‍ය හමුවකදීය. ”සිරියා රජය සතුව රසායනික සහ ජීව විද්‍යාත්මක අවි තිබෙනවා. ඒවා ලෝකයටම තර්ජනයක්. සිරියා රජය ඒවා යොදා ගෙන කැරැලිකරුවන්ට පහර දීමට ඇමෙරිකාව ඉඩ දෙන්නේ නැහැ. අපි සිරියා ජනපතිට අනතුරු අඟවා තිබෙනවා එසේ කිරීමෙන් වළකින ලෙසට” යැයි ඇමෙරිකා ජනපතිවරයා කියා සිටියේය. අසාද්ගේ රජය සතුව රසායනික අවි විශාල ප‍්‍රමාණයක් ඇතැයි ඇමෙරිකාවේ සී.අයි.ඒ. සංවිධානය මෙන්ම කැරැලිකාර පාර්ශ්වය ද පවසයි. සිරියා රජය එම අවි යොදා ගනිමින් තමන්ට ප‍්‍රහාරයක් එල්ල කිරීමට සූදානම් වන බව කැරැලිකාර පාර්ශ්වය නියෝජනය කරන ‘නිදහස් සිරියානු’ හමුදාව බිය පළ කර ඇත. සිරියාවට එරෙහි තමන් හමුදා ප‍්‍රහාරයක් එල්ල කරන බවට ඇමෙරිකානු ජනාධිපතිවරයා තර්ජනය කළ පළමු අවස්ථාව වන්නේ මෙයයි. මේ වනවිටත් ඇමෙරිකා රජයේ අනුදැනුම පරිදි එරට සී.අයි.ඒ. බුද්ධි අංශ නිලධාරීන් සිරියා කැරැලිකරුවන්ට සහාය ලබා දෙයි. සී.අයි.ඒ. නිලධාරීන් පමණක් නොව බි‍්‍රතාන්‍යයේ එම්.අයි.6 සහ ජර්මන් බුද්ධි අංශ නිලධාරීන්ගේ සහාය ද හිමි වන්නේ කැරැලිකරුවන්ටය. මේ වනවිට කැරැලිකරුවන්ට එරෙහිව ඩමැස්කස් සහ ඇලෙප්පෝ යන නගරවල දරුණු සටන් පවතී. සිරියා රජයේ හමුදා කැරැලිකරුවන්ට පහර දෙන්නේ යුද ටැංකි, ප‍්‍රහාරක හෙලිකොප්ටර් සහ ජෙට් යානා යොදා ගෙනය. එක්සත් ජාතීන්ගේ සංවිධානය පවසන්නේ සිරියාවේ ගැටුම්වලින් 20,000 කට වැඩි පිරිසක් ජීවිතක්ෂයට පත්ව ඇති බවය. එක්සත් ජාතීන්ගේ සංවිධානය, සිරියා අර්බුදය විසඳීමට හඳුන්වා දුන් ඔවුන්ගේ සාම සැලැස්ම අසාර්ථක වීමෙන් පසු සිරියාවේ සාම නිරීක්ෂණ කටයුතු නවතා දමා පිටව ගොස් ඇත.