සෝල්හිදීය (රොයිටර්)
 
කොරියානු යුද්ධය නිසා බෙදුණු පවුල් නැවත එකතු කිරීම සඳහා උතුරු සහ දකුණු කොරියානු නායකයෝ අද (22) සාකච්ඡා පැවැත්වූහ. වසර තුනකට පසු වෙන්වුණු පවුල් එක් කරන පළමු අවස්ථාව මෙය වන අතර රතු කුරුස සංවිධානය ද මෙම කාර්යයට මැදිහත් වි සිටී. 
 
න්‍යෂ්ටික සහ මිසයිල වැඩසටහන් හේතුවෙන් පළුදු වූ සබඳතා වර්ධනය කරගැනීමට අප්‍රේල් 27 වැනිදා පැවැති හමුවේදී උතුරු කොරියානු නායක කිම් ජොන් උන් සහ මූන් ජේ ඉන් එකඟතාව පළ කර ඇති අතර ඒ සඳහා අවශ්‍ය පියවර ගන්නා බව උතුරු කොරියානු නායකයා එම හමුවේදී පොරොන්දු විය. 
 
එහි ප්‍රතිඵලයක් ලෙස මෙලෙස කොරියානු යුද්ධය හේතුවෙන් දෙරටට වෙන්ව ගිය පිරිස් එකතු කිරීමට උතුරු සහ දකුණු කොරියාව එකඟතාව පළ කර තිබේ. 
 
උතුරු කොරියාවේ සංචාරක ගමනාන්තයක් වන කුම්ගන්ග් කඳුකර ප්‍රදේශයේදී දෙරටේ නියෝජිතයන් අතර සාකච්ඡා පවත්වා තිබේ. එම සාකච්ඡාවලදී පවුල් යළි එක් කිරීම වෙනුවෙන් ලබන අගෝස්තු මාසයේදී දෙරටට පොදු නිවාඩු දිනයක් ප්‍රකාශයට පත් කිරීමට නියෝජිතයන් එකඟතාව පළ කර තිබේ. 
 
“යහපත් ප්‍රතිඵල උදෙසා අපි එකිනෙකා විශ්වාස කරමින් ක්‍රියාශීලිව කටයුතු කළ යුතු” යැයි උතුරු කොරියානු නියෝජිත පිරිසේ නායක පාක් යොන්ග් ඉල් පැවැසීය. 
 
කොරියානු යුද්ධය නිසා බෙදී උතුරුට සහ දකුණට ගිය පිරිස බැලීම සඳහා යා යුතු බවත් “එම ක්‍රියාවලිය මානුෂීය සහ මානව අයිතිවාසිකම්” සම්බන්ධ කරුණක් ලෙස සලකා ක්‍රියාකළ යුතු බවත් කොරියානු නියෝජිතයෝ කීහ. එදා කොරියානු යුද්ධය වෙන්ව ගිය පවුල්වල සාමාජිකයන්ගෙන් බොහෝ දෙනා අද වනවිට ඔවුන්ගේ 80 වැනි වියත් පසු කර සිටිති. 
 
මීට පෙර අවස්ථා කිහිපයකදීම මෙලෙස වෙන්වුණු පවුල් වල සාමාජිකයන් යළි එකතු කිරීමේ වැඩසටහන් පවත්වන ලද අතර ඒවා අවසන් වූයේ වේදනාකාරී වෙන්වීම් වලිනි. 
 
එම වැඩසටහන්වලින් කිහිපයක්ම රූපවාහිනිය ඔස්සේ විකාශය  කෙරුණි. එම බොහෝමයක් යළි හමුවීම් කඳුළු සහ වේදනාවෙන් පිරුණු මුණ ගැසීම් විය. අවසන් වරට කොරියානු යුද්ධය නිසා උතුරට සහ දකුණට වෙන්ව එකම පවුලේ සාමාජිකයන් යළි එකතු කරන ලද්දේ 2015 වසරේදීය.
 
055