පසුගියදා කඩාවැටුණු බංග්ලාදේශයේ ඩකා නුවර පිහිටි මහල් අටකින් යුත් වෙළෙඳ සංකීර්ණයේ හිමිකරු ඊයේ(28) පොලිස් අත්අඩංගුවට පත්විය.
ගොඩනැගිල්ල කඩා වැටීමෙන් එහි සිටි 370කට අධික පිරිසක් ජීවිතක්ෂයට පත්වූහ. තවමත් සුන්බුන් අතර සිරවී සිටින පුද්ගලයන් සොයා අඛණ්ඩ මෙහෙයුම් සිදු කෙරේ. දිවි ගලවාගැනීමේ මෙහෙයුම්වලදී 50කට අධික පිරිසක් බේරා ගැනීමට හැකි විණැයි සහන සේවකයෝ පවසති. 
අනාරක්ෂිත ලෙස නිසි ප‍්‍රමිතියකින් තොරව ගොඩනැගිලි ඉදි කර තිබීම එහි හිමිකරුට එල්ල වන චෝදනාවයි. එම චෝදනා යටතේ ඔහු අධිකරණය හමුවට පැමිණවීමට නියමිත බව ඩකා පොලිසිය පවසයි.
අත්අඩංගුවට ගත් අවස්ථාවේදී ඇඟලූම් කම්හල් හිමිකරු ඉන්දියාවට පැන යාමට සූදානමින් සිටි බව එරට නියෝජ්‍ය ස්වදේශ කටයුතු ඇමැති ෂම්සුල් හක් සඳහන් කරයි.
කම්හල් හිමිකරු අත්අඩංගුවට පත්ව ඇත්තේ ඉන්දීය - බංග්ලාදේශ දේශසීමාබදව පිහිටි බෙනපෝල් නගරයේදීය. 
මේ අතර කඩාවැටුණු ගොඩනැගිල්ලේ පිහිටි කර්මාන්ත ශාලාවල හිමිකරුවන් තිදෙනෙක් පෙරේදා පොලිස් අත්අඩංගුවට පත්විය. සේවකයන්ගේ ජීවිත පිළිබඳව නොසැලකිලිවත්වීම ඔවුනට එල්ල වන මූලික චෝදනාවයි.