බලයෙන් පහ කළ ඊජිප්තු ජනපති හොස්නි මුබාරක්ගේ රජයේ අගමැතිවරයා ලෙස කටයතු කළ අහ්මඞ් නසිෆ්ට එල්ල වූ දුෂණ චෝදනාවලට වැරැදිකරු වීම නිසා එරට අධිකරණයක් ඊයේ(13) තෙවසරක සිරදඬුවමක් සහ ඩොලර් මිලියන 1.5ක දඩයක් නියම කළේය. වත්මන් ඊජිප්තු ජනපති මොහොමඞ් මොර්සි ජනාධිපතිවරණය ජය ගැනීමෙන් අනතුරුව එක්සත් අරාබි එමීර් රාජ්‍යයට පළා ගිය නසිෆ්ව අත්අඩංගුවට ගැනීමට එරට අධිකරණයක් ඉකුත් සතියේදී වරෙන්තු නිකුත් කළේය. හොස්නි මුබාරක්ගේ පුතුන් දෙදෙනාට එරෙහිව කි‍්‍රයාත්මක වන නඩු විභාගයේදී දුෂණ චෝදනාවලට වැරැදිකරු වූ නසිෆ්ට සිරදඬුවම සහ දඩමුදල නියම කළ බව එම නඩුව විභාග කළ විනිසුරුවරයා පැවැසීය. 2004 වසරේදී ඊජිප්තු අගමැති ලෙස වැඩ බාරගත් නසිෆ් 2011 ජනවාරි මාසයේදී සිය ධූරයෙන් ඉවත් වූයේ එවක ජනපතිව සිටි හොස්නි මුබාරක්ට එරෙහි උද්ඝෝෂණ ආරම්භවීමට පෙරය.