ඊජිප්තු මැතිවරණයෙන් ජයග‍්‍රහණය කළ ‘මුස්ලිම් සහෝදරත්වය’ පක්ෂයේ නායක මොහොමඞ් මොර්සි පෙරේදා (30) ජනපති ධුරයේ දිවුරුම් දුන්නේය. ඒ අනුව අරාබි ලෝකයේ වැඩිම ජනගහනයක් සිටින රාජ්‍යය වන ඊජිප්තුවේ ප‍්‍රථම ඉස්ලාමීය ජනාධිපතිවරයා වන්නේ මොහොමඞ් මොර්සිය. දිවුරුම් දීමෙන් පසු කයිරෝ නුවර තහ්රීර් චතුරස‍්‍රයට රැස්ව සිටි දහස් ගණන් ඊජිප්තු වැසියන් අමතමින් නව ජනපතිවරයා ප‍්‍රතිඥාවක් දුන්නේ ඊජිප්තුව සිවිල් රාජ්‍යයක් බවට පත් කිරීමටත් ඊජිප්තු මුස්ලිම්වරුන්ට සහ ඊජිප්තු කි‍්‍රස්තියානුවන්ට රටේ සමඟියෙන් ජීවත් වීමට සුදුසු වාතාවරණයක් ඇති කරන බවත්ය. පසුගිය වසරේ මාර්තු මාසයේදී ‘අරාබි වසන්තය’ ඇරැඹී, ඒකාධිපතිවාදී පාලන රටාවක් ගෙන ගිය හොස්නි මුබාරක් බලයෙන් නෙරපා දැමීමට ජනතා විරෝධතාවලදී ‘මුස්ලිම් සහෝදරත්වය’ ප‍්‍රමුඛස්ථානයක් ගෙන කි‍්‍රයා කළේය. මුබාරක් බලයෙන් ඉවත් වූයේ හමුදා පාලක මණ්ඩලයකට රටේ පාලනය බාර දෙමින්ය. එම පාලක මණ්ඩලයේ බලතල අඩු කිරීමට තමන් කටයුතු කරන බවට ද නව ජනාධිපති මොහොමඞ් මොර්සි ප‍්‍රතිඥාවක් දුන්නේය.