ඉරානයේ ජනපතිවරණයේ පළමු වටය ඊයේ (14) උදෑසන ඉතා සාමකාමී අයුරින් ආරම්භ විය.
ඡුන්ද ප‍්‍රකාශ කිරීම උදෑසන අටට ආරම්භ වූ අතර සවස පහට අවසන් විය. ඉරාන වැසියෝ මිලියන 50.5 ක් ඡුන්දය ප‍්‍රකාශ කිරීමට සුදුසුකම් ලබා සිටි අතර, මිලියන 1.6 කට වැඩි පිරිසක් පළමු වරට මෙවර ඡුන්දය ප‍්‍රකාශ කිරීමට සුදුසුකම් ලබා සිටියහ.
රට පුරා ඡුන්ද මධ්‍යස්ථාන 60,000 ක් කි‍්‍රයාත්මක වූ අතරවිදෙස් රටවල සිටින ඉරාන වැසියන් වෙනුවෙන් ඡුන්ද මධ්‍යස්ථාන 285 ක් කි‍්‍රයාත්මක වූ බව ද වාර්තා වේ.
මැතිවරණය ආරම්භ වෙද්දී, එරට උත්තරීතර නායක අයතුල්ලා කොමේනී, සිය ඡුන්දය ප‍්‍රකාශ කළේය.
ඉරාන විප්ලවයෙන් පසු, ඉරානයේ පවතින්නේ ඉස්ලාම් දහම පාදක කොට ගත් දේශපාලන ක‍්‍රමවේදයකි. උත්තරීතර ආධ්‍යාත්මික නායක අයතුල්ලා කොමේනී සහ ඔහුගේ නායකත්වයෙන් යුත් උත්තරීතර පාලක මණ්ඩලය, ජනපති ධුරය ඉක්මවා ගිය සුපිරි බලතල හිමි වී ඇත.
ජනපති ධුරය සඳහා තරඟ වැදීමට නම්, අපේක්ෂකයන්ට එම උත්තරීතර පාලක මණ්ඩලයේ ද අනුමැතිය හිමි විය යුතුය.
ඉරානයේ දේශපාලනය මෙන්ම මැතිවරණ ද ප‍්‍රධාන වශයෙන් පවතින්නේ ප‍්‍රතිසංස්කරණවාදීන් හා දැඩි මතධාරීන් අතර සටනක් ලෙසය.