ඉරාන ගුවන් සීමාවට අනවසරයෙන් ඇතුළු වී ඔත්තු බලමින් සිටිද්දී ඉරාන හමුදාව අත්ට පත්වූ නියමුවන් රහිත ඇමෙරිකන් ඩ්‍රෝන යානය ආපසු බාර දෙන්නැයි ඇමෙරිකා ජනාධිපති බැරැක් ඔබාමා ඉරාන රජයෙන් ඉල්ලීමක් කරයි.ඉරාන හමුදාව අතට පත්වී ඇත්තේ නවීන තාක්ෂණයෙන් නිපදවන ලද ආර් කියු 170 සෙන්ටිනල් වර්ගයේ නියමුවන් රහිත යානයකි. ඇමෙරිකාව එම යානය භාවිතා කරන්නේ ඔත්තු නිරීක්ෂණ කටයුතු සඳහාය.ගුවන් සීමාවට ඇතුළු වූ නිසා යානය බිම හෙළීමට තමන් සමත් වූ බව ඉරාන හමුදාව ප‍්‍රකාශ කළේ ඉකුත් පස් වැනිදාය. එම අවස්ථාවේදී ඇමෙරිකාව ඒ ගැන මුනිවත රැක්කේය. පසුගිය අට වැනිදා ඉරාන හමුදාව එම යානය එරට මාධ්‍ය ඔස්සේ ලොවට ප‍්‍රදර්ශනය කළේය. එම අවස්ථාවේදී ඇමෙරිකා රජය ප‍්‍රකාශ කළේ ඉරාන/ඇෆ්ගනිස්තාන දේශසීමාවේදී ආර් කියු 170 සෙන්ටිනල් වර්ගයේ යානයක් තම පාලනයෙන් ගිලිහී අතුරුදන් වූ බවය. ඉරාන හමුදාව අතට යානය පත්වීම ගැන කනස්සල්ල පළ කරන ඇමෙරිකා ජනාධිපති බැරැක් ඔබාමා පෙරේදා (12) ඉරාන රජයෙන් ඉල්ලා සිටියේ ඔවුන් සතුව ඇති ඇමෙරිකන් යානය යළි ඇමෙරිකාවට භාර දෙන ලෙසය.ආර් කියු 170 සෙන්ටිනල් වර්ගයේ යානා නිර්මාණය කෙරෙන්නේ ඇමෙරිකාවේ තාක්ෂණය උපරිම ලෙස භාවිතා කරමින්ය. එය පියාසර කරන්නේ අඩි 50,000 ක් ඉහළ අහසේ රේඩාර්වලට හසු නොවන මට්ටමකය.මීටර් 27 ක් දිග, මීටර් 2 ක් උසැති යානය බිම හෙළීමට ඉරානය සමත් වූයේ කෙසේදැයි තවමත් අබිරහසකි. එය ඇමෙරිකානුවන්ට ද ගැටලූවක් වී ඇත.යානයට සිදුවී ඇත්තේ සුළු හානියක් පමණක් යැයි ඉරාන හමුදාව පවසයි. ඉරානය කෙසේ හෝ උපක‍්‍රමයකින් යානයේ ස්වයංකී‍්‍රය පාලනය තමන් අතට ගෙන ඇතැයි ඇමෙරිකා රජය අනුමාන කරයි.පාකිස්තානයේ ඇබොට්ටාබාද් නුවර නිවසක අල් කයිඩා නායක ඔසාමා බින් ලාඩන් සැඟවී සිටියදී, එම නිවස ගැන ඔත්තු බැලීම සඳහා ඇමෙරිකා හමුදා යොදා ගත්තේ ද ආර් කියු 170 සෙන්ටිනල් වර්ගයේ යානවකි.ඉරානය අතට පත්ව ඇති ඇමෙරිකා යානය ප‍්‍රතිසංස්කරණය කොට හමුදා කටයුතුවලට යොදා ගන්නා බව ඉරාන රජය පවසා ඇත.න්‍යෂ්ටික බලශක්ති වැඩසටහනට මුවා වී ඉරානය, හොර රහසේ පරමාණු බෝම්බ නිපදවන බවට ඇමෙරිකාව චෝදනා කරයි.  එම චෝදනා තරයේ ප‍්‍රතික්ෂේප කරන ඉරානය පවසන්නේ ඇමෙරිකාව ඉරානයේ න්‍යෂ්ටික බලාගාර සහ හමුදා කටයුතු ගැන ඔත්තු බැලීමට ආර් කියු 170 සෙන්ටිනල් යානය එවූ බවය.