ඉන්දියාවේ සංචාරය කරන චීන ආරක්ෂක ඇමැති ලියැං ගුඅන්ග්ලී ඊයේ (4) නවදිල්ලි නුවරදී ඉන්දීය ආරක්ෂක ඇමැති ඒ.කේ ඇන්තනි හමුවී දකුණු ආසියා කලාපයේ ආරක්ෂාව තරකර ගැනීම සම්බන්ධයෙන් සාකච්ඡා කළේය. චීන ආරක්ෂක ඇමැතිවරයා ඉන්දියාවේ සංචාරය කරන්නේ සිවුදින ශ්‍රී ලංකා සංචාරයකින් ද පසුවය. ඇමැතිවරයා ප‍්‍රමුඛ විසිතුන් දෙනකුගෙන් සමන්විත ඔහුගේ දූත පිරිස නවදිල්ලියට පැමිණි අවස්ථාවේ ඔවුන් හරසරින් පිළි ගැනීමට ඉන්දීය රජය කටයුතු කර තිබුණි. චීන ආරක්ෂක ඇමැතිවරයකු ඉන්දියාවේ සංචාරය කරන්නේ වසර අටකට පසුවය. චීන දූත පිරිස බංග්ලාදේශය, මාලදිවයින යන රටවල ද සංචාරය කළ අතර කලාපීය ආරක්ෂාව තරකර ගැනීම සම්බන්ධයෙන් ඒ ඒ රටවල් සමඟ ද සාකච්ඡා පැවැත්වූහ. කලාපීය ආරක්ෂක කටයුතුවලට අමතරව ඉන්දු/චීන දේශසීමා අර්බුදය ගැන ද දෙරටේ ආරක්ෂක ප‍්‍රධානීන් අතර සාකච්ඡා පැවැත්විණි. ඉන්දීය ආරක්ෂක ඇමැතිවරයා හමුවීමෙන් පසු ඉන්දීය ති‍්‍රවිධ හමුදාපතිවරුන් හමුවී සාකච්ඡා පැවැත්වීමට ද චීන ආරක්ෂක ඇමැතිවරයා ප‍්‍රමුඛ දූත පිරිස අමතක නොකළහ. එහිදී ඉන්දු/චීන නාවික යුද අභ්‍යාස පැවැත්වීමට ද දෙරටේ ආරක්ෂක ප‍්‍රධානීහු කැමැත්ත පළ කළහ. ඉන්දීය සංචාරයෙන් පසු චීන ආරක්ෂක ඇමැතිවරයා ප‍්‍රමුඛ දූත පිරිස පාකිස්තානය බලා යෑමට නියමිතය. දකුණු ආසියා කලාපයේ ආරක්ෂාව තර කර ගැනීමට චීනය බලාපොරොත්තු වන්නේ ඇමෙරිකාව කෙමෙන් කෙමන් ආසියාවට යොමු වීමට උත්සාහ ගන්නා නිසාය. කෙසේ නමුත් චීන රජය මීට දින කිහිපයකට පෙර පවසා තිබුණේ තම ආරක්ෂක ඇමැතිවරයාගේ ආසියා සංචාරයෙන් කිසිදු පාර්ශ්වයකට ‘තර්ජනයක්’ කිරීමට තමන් අපේක්ෂා නොකරන බවය. මේ වනවිට ඇමෙරිකා රාජ්‍ය ලේකම් හිලරි ක්ලින්ටන් රාජ්‍යතාන්ති‍්‍රක සබඳතා ශක්තිමත් කර ගනිමින් ආසියාවට අයත් පැසිෆික් සාගර කලාපීය දූපත් රාජ්‍යවල සංචාරය කරන්නීය. ඇය චීනයට පැමිණීමට ද නියමිතය. ඇය ඊයේ ඉන්දුනීසියාවට පැමිණි අතර එරට ජනපති මන්දිරයේදී ජනපති සුසිලෝ යුදයෝනෝව් හමුවී සාකච්ඡා පැවැත්වූවාය.