2010-2015 දක්වා කාලය තුළ ඉන්දියා පොලිස් අත්අඩංගුවේදී 600 දෙනකු පමණ මිය ගොස් ඇති බවට 'හියුමන් රයිටස් වොච්' සංවිධානය පවසයි.

එම මරණ වලට කිසිම පොලිස් නිලධාරියකු වරදකරු කර නොමැති බවද එම සංවිධානය කියයි.

පොලිස් අත්අඩංගුවේදී සිදුවන මරණ වලට බරපතල රෝග,සිය දිවි හානි කරගැනීම්,අනතුරු හා පලා යාමට තැත් කිරීමේදී සිදුවන ගැටුම් ‍හේතු ලෙස ඉදිරිපත් කර ඇති බවද ඔවුහු පෙන්වා දෙති.

අත්අඩංගුවේදී සිදුවන වධහිංසා එම මරණ වලට හේතුවන බව මානව හිමිකම් කණ්ඩායම් පෙන්වා දුන්නද පොලිසිය එම චෝදනා ප්‍රතික්ෂේප කරයි.

එම සංවිධානය “රෙගුලාසි උල්ලංගනය කරමින් අත්අඩංගුවේ සිදු කරන වධහිංසා හා වැරදිකරුවන්ට දඬවම් නොලැබීම“ නමින් වාර්තාවක් ද නිකුත් කළේය.

එම වාර්තාව අත්අඩංගුවට ගනු ලැබු පුද්ගලයන් හා ඔවුන්ගේ පවුලේ අය සමග සාකාච්ඡා කර සැකසු වාර්තාවක් බව එම සංවිධානය කියයි.

ඉන් අවස්ථා 17කදී පොලිසිය අත්අඩංගුවට ගැනීමේ නීති හා රෙගුලාසි අනුගමනය කර නොමැති බවද එහි සඳහන් වේ.

නිලධාරීන්ට නිසි දඬුවම් ලබා දුන්නහොත් මිස ඉන්දීය පොලිස් නිලධාරීන් එය වැරැද්දක් බව තේරුම් නොගනු ඇතැයි හියුමන් රයිටස් වොච් සංවිධානයේ දකුණු ආසියා අධ්‍යක්ෂක මීනාක්ෂි ගංගුලි පවසයි.

නීතිය අනුව අත්අඩංගුවට ගන්නා සෑම පුද්ගලයකුම පැය 24ක් ඇතුළත වෛද්‍ය පරීක්ෂණයකින් අනතුරුව අධිකරණයට ඉදිරිපත් කළ යුතුය.

2015 වසරේ සිදුව ඇති මරණ 97කින් 67කදීම සැකකරු පැය 24ක් ඇතුළත අධිකරණයට ඉදිරිපත් කිරීමට පොලිසිය අපොහොසත් වී ඇති බව හෝ පැය 24කට පෙර සැකකරු මිය ගොස් ඇති බව වාර්තා අනුව පෙනී යන බව එම වාර්තාවේ සඳහන් වේ.