ඉන්දියාවේ මුම්බායි නගරය දෙසට දරුණු සුළි කුණාටුවක් ළඟා වෙමින් පවතින බව කාළගුණ අනාවැකි පවසයි.

අරාබි මුහුද හරහා නිරිත දෙසින් ළඟා වන මෙම සුළි කුණාටුව නිසර්ගා ලෙස නම්කර තිබේ.
 
 වසර 120කින් පමණ පසු මුම්බායි නගරය වෙත හමා එන බරපතල සුළි කුණාටුවක් ලෙස මෙය හඳුන්වා ඇති අතර දැනටමත් දස දහස් ගනනක් පිරිස් උස් භූමි වෙත ගෙනගොස් ඇතැයි වාර්තා වේ.
 
ඉන්දියානු කාළගුණ අංශ පවසන්නේ සුළි කුණාටුව මේ වනවිට මුම්බායි සිට කිලෝමීටර් 215ක් පමණ දුරින් හමා එමින් පවතින බවයි. එය දරුණු සුළි කුණාටුවක් දක්වා තීව්‍ර වී ඇති බවද ඔවුහු පවසති.
 
පැයට කිලෝමීටර් 13ක පමණ වේගයෙන් සුළං හමා එන බවත් දැනටමත් මුම්බායි නගරයට තද වැසි ඇදවැටෙමින් පවතින බවත් සඳහන් වේ.
 
හදිසි තත්ත්වයකට සූදානම් වී සිටින ලෙස ප්‍රාන්ත රජය ජනතාවගෙන් ඉල්ලා ඇත.
ඉන්දියාවේ නැගෙනහිර වෙරළ තීරයට අම්ෆන් සුළි කුණාටුව කඩා වැදීමෙන් සති දෙකක් ගතවීමටත් පෙර මෙම කුණාටුව පැමිණේ.
 
අම්ෆන් සුළි කුණාටුවෙන් ඉන්දියාවේ සහ අසල්වැසි බංගලාදේශයේ 85කට වැඩි පිරිසක් මියගියහ.

මිලියන 20ක පමණ ජනගහනයක් වෙසෙන මුම්බායි, ඉන්දියාවේ ජනාකීර්ණම නගරයයි. එය ඉන්දියාවේ මූල්‍ය අගනුවර ද වේ.

කොරෝනා රෝගය ව්‍යාප්ත වීම හේතුවෙන් මේ වනවිටත් මුම්බායි නගරය දැඩි ලෙස පීඩාවට පත්ව ඇත. 

එහි ආසාදිතයන් 40,000 ක් පමණ තහවුරු වී ඇති අතර 1, 400ක් පමණ මියගොස් තිබේ. 
 
ඉන්දියාවෙන් වාර්තා වන සමස්ථ කොරෝනා ආසාදිතයින් ගණන  207,191ක් වන අතර මරණ 5, 829ක් සිදුවී ඇත.
 
(බීබීසී ඇසුරිණි - 085)